کویت میں ایرانی پاسدارانِ انقلاب کے چار افسران کی گرفتاری، تہران نے تصدیق کر دی

تہران (ڈیلی اردو) کویت کی جانب سے ایرانی پاسدارانِ انقلاب کے چار اراکین کو غیر قانونی طور پر ملک میں داخل ہونے پر گرفتار کرنے کے اعلان کے بعد ایرانی وزارتِ خارجہ نے مؤقف اختیار کیا ہے کہ کویت کی سمندری حدود میں ان کا داخلہ ان کی کشتی کے نیویگیشن نظام میں ’خرابی‘ کا نتیجہ تھا۔

ایرانی وزارتِ خارجہ نے کہا کہ یہ افراد ’معمول کی بحری گشت‘ پر اپنی ذمہ داریاں انجام دے رہے تھے۔

ایرانی وزارتِ خارجہ نے اپنے بیان میں کہا ہے کہ ’کویت کی وزارتِ خارجہ اور وزارتِ داخلہ کے بیانات میں ایران پر کویت کے خلاف تخریبی کارروائیاں کرنے کی منصوبہ بندی کے حوالے سے جو الزامات عائد کیے گئے ہیں وہ مکمل طور پر بے بنیاد ہیں اور انہیں مسترد کیا جاتا ہے۔‘

کویت کی وزارتِ خارجہ نے اس واقعے کو ’تخریبی عمل‘ اور کویت کی خودمختاری پر ’کھلا حملہ‘ قرار دیا تھا۔

کویت کی وزارتِ داخلہ نے بھی کل اعلان کیا تھا کہ اس نے ’پاسدارانِ انقلاب سے وابستہ چار دراندازوں‘ کو گرفتار کیا ہے، جو سمندر کے راستے ملک میں داخل ہونے کی کوشش کر رہے تھے۔

کویتی وزارتِ داخلہ کے بیان کے مطابق گرفتار کیے گئے افراد میں پاسدارانِ انقلاب کی بحریہ کےدو کرنل، ایک کیپٹن اور ایک لیفٹیننٹ شامل ہیں اور انہوں نے ’اعتراف‘ کیا کہ ان کا مشن کویت کے بوبیان جزیرے میں ’دراندازی‘ کرنا تھا۔

گرفتار افراد میں کرنل امیر حسین عبد محمد زراعی، بحری کرنل عبدالصمد یدالہ قنواتی، بحری کپتان احمد جمشید غلام رضا ذو الفقاری اور بری لیفٹیننٹ محمد حسین سہراب فروغی راد شامل ہیں۔ جبکہ دو افسران فرار ہو گئے، جن میں بحری کپتان منصور قمبری اور کشتی کے انچارج عبدالعلی کاظم سیامری شامل ہیں۔

ادھر متحدہ عرب امارات کے نائب وزیراعظم اور وزیر خارجہ عبداللہ بن زاید النہیان نے کویت کے بوبیان جزیرے میں ایرانی پاسدارانِ انقلاب کے اہلکاروں کی دراندازی اور دہشت گردی کی منصوبہ بندی کی کوشش کی شدید مذمت کی ہے۔

انہوں نے کہا کہ متحدہ عرب امارات اس معاملے میں کویت کے ساتھ مکمل یکجہتی کا اظہار کرتا ہے اور اس کی سلامتی و استحکام کے لیے ہر ممکن تعاون جاری رکھے گا۔

دوسری جانب سعودی عرب کی وزارتِ خارجہ نے کویت کے بوبیان جزیرے میں مبینہ طور پر پاسدارانِ انقلاب اسلامی سے تعلق رکھنے والے مسلح گروہ کی دراندازی اور تخریبی منصوبے کی شدید مذمت کی ہے۔

وزارتِ خارجہ کے بیان میں کہا گیا ہے کہ یہ اقدام کویت کی خودمختاری کی کھلی خلاف ورزی اور خطے کے امن و استحکام کے لیے خطرہ ہے۔

سعودی عرب نے کویت کے ساتھ مکمل یکجہتی اور ہر سطح پر حمایت کا اعادہ کرتے ہوئے کہا ہے کہ ایسے اقدامات بین الاقوامی قوانین اور اقوام متحدہ کے چارٹر کی خلاف ورزی ہیں۔