گلگت بلتستان میں واپڈا کے دو افسران کو پاکستانی طالبان نے اغوا کرلیا

اسلام آباد (ڈیلی اردو) پاکستان کے زیرِ انتظام گلگت بلتستان کے ضلع دیامر سے کالعدم تحریک طالبان پاکستان (ٹی ٹی پی) سے وابستہ عسکریت پسندوں نے واپڈا کے دو افسران کو اغوا کر لیا ہے۔ واقعہ ہفتے کے روز تھور وادی کے علاقے گبر میں پیش آیا جو دیامر بھاشا ڈیم کے تعمیراتی مقام کے قریب واقع ہے۔

سرکاری ذرائع کے مطابق دونوں مغوی افسران کا تعلق پنجاب سے ہے اور وہ دیامر بھاشا ڈیم منصوبے پر تعینات تھے۔ 

پولیس کے مطابق ہفتے کو چھٹی کے دن دونوں افسران اپنے چھ مقامی ساتھیوں کے ہمراہ خریداری کے لیے تھور کے علاقے گبر گئے تھے، جہاں مسلح عسکریت پسندوں نے انہیں روک کر اغوا کر لیا اور قریبی پہاڑی علاقے کی جانب لے گئے۔

ذرائع کے مطابق یہ علاقہ پہلے سے ہی عسکریت پسندوں کے ٹھکانے کے طور پر جانا جاتا ہے، جہاں سے ماضی میں بھی اس نوعیت کی کارروائیاں ہو چکی ہیں۔ رواں سال اگست میں تھور کے قریب قراقرم ہائی وے پر ایک چیک پوسٹ پر دہشت گردوں کی فائرنگ سے گلگت بلتستان اسکاؤٹس کے دو اہلکار ہلاک اور ایک زخمی ہوا تھا۔

ایک سرکاری اہلکار نے نام ظاہر نہ کرنے کی شرط پر بتایا کہ مغوی افسران کی محفوظ بازیابی کے لیے مقامی مذہبی رہنماؤں کو مذاکراتی عمل میں شامل کیا گیا ہے۔ اب تک تین دور مذاکرات ہو چکے ہیں تاہم عسکریت پسندوں نے کچھ مطالبات پیش کیے ہیں جن کی تفصیلات ظاہر نہیں کی گئیں۔

دوسری جانب تھور وادی کے مقامی باشندوں نے اتوار کو ایک جرگہ منعقد کیا جس میں اغوا کے واقعے کی شدید مذمت کی گئی۔ جرگے میں بڑی تعداد میں مقامی افراد نے شرکت کی اور متفقہ طور پر ایک قرارداد منظور کی گئی جس میں واضح کیا گیا کہ اس واقعے کا تھور کے عوام سے کوئی تعلق نہیں۔

قرارداد میں کہا گیا کہ یہ ایک انفرادی کارروائی ہے جس کی مقامی آبادی شدید مذمت کرتی ہے۔ جرگے میں حکومت اور انتظامیہ سے اپیل کی گئی کہ وہ بے گناہ شہریوں کو ہراساں نہ کرے بلکہ ملوث عناصر کو گرفتار کر کے قانون کے مطابق سزا دے۔ قرارداد میں مزید کہا گیا کہ حکومت ان دہشت گردوں کے خلاف سخت ترین کارروائی کرے تاکہ آئندہ کوئی اس قسم کی حرکت کرنے کی جرات نہ کرے۔

پولیس اور سیکیورٹی فورسز نے علاقے میں تلاش اور گھیراؤ کی کارروائیاں شروع کر دی ہیں جبکہ داخلی و خارجی راستوں کو بند کر دیا گیا ہے۔ حکام کے مطابق مغوی افسران کی محفوظ رہائی کے لیے کوششیں جاری ہیں۔