ہنگو میں آپریشن کے دوران مارٹر گولے آبادی پر گرنے سے 6 افراد ہلاک، 13 زخمی

ہنگو (ڈیلی اردو) پاکستان کے شورش زدہ صوبہ خیبرپختونخوا کے ضلع ہنگو میں دہشت گردوں کے خلاف جاری آپریشن کے دوران مارٹر گولے آبادی کے قریب گرنے سے 6 افراد ہلاک جبکہ 13 زخمی ہو گئے۔

پولیس کے مطابق ضلع ہنگو اور ضلع اورکزئی کے سرحدی علاقوں زرگری، شناوری اور دورڑی بانڈہ میں کالعدم تحریک طالبان پاکستان کے مسلح دہشت گردوں کی موجودگی کی اطلاع پر دو روز سے آپریشن جاری تھا۔

ڈپٹی کمشنر ہنگو گوہر زمان وزیر کے مطابق کارروائی کے دوران مارٹر گولے آبادی میں گرے جس کے نتیجے میں 6 افراد ہلاک اور 13 زخمی ہوئے۔ 

انہوں نے بتایا کہ دورڑی بانڈہ بازار میں گولے گرنے سے سول آبادی کو شدید نقصان پہنچا۔

واقعے کے بعد علاقے میں کشیدگی بڑھ گئی جبکہ زرگیری کے علاقے میں دہشت گردوں اور پولیس کے درمیان جھڑپیں بھی جاری رہیں۔

ڈی ایس پی امجد حسین کے مطابق زخمیوں کو فوری طور پر قریبی اسپتال منتقل کر دیا گیا ہے جہاں انہیں طبی امداد دی جا رہی ہے۔ 

انہوں نے کہا کہ دہشت گردوں کے خلاف پولیس اور سیکیورٹی فورسز کا آپریشن جاری ہے اور علاقے میں سیکیورٹی سخت کر دی گئی۔