ہنگو میں دہشت گردی کا بڑا منصوبہ ناکام

ہنگو (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع ہنگو میں پولیس نے بروقت کارروائی کرتے ہوئے دہشت گردی کا بڑا منصوبہ ناکام بنا دیا۔ تھانہ سٹی کی حدود میں سماری روڈ پر نصب 10 کلو وزنی بم کو ناکارہ بنا کر ممکنہ تباہی ٹال دی گئی۔

پولیس کے مطابق مشکوک بم کی اطلاع ملتے ہی بھاری نفری فوری طور پر موقع پر پہنچ گئی اور علاقے کو گھیرے میں لے لیا گیا۔ بعد ازاں بم ڈسپوزل اسکواڈ نے کارروائی کرتے ہوئے ریموٹ کنٹرول آئی ای ڈی کو محفوظ طریقے سے ناکارہ بنا دیا۔

ڈی پی او طارق حبیب خان کے مطابق ابتدائی تحقیقات سے معلوم ہوا ہے کہ دھماکا خیز مواد تخریب کاری کے مذموم عزائم کے لیے نصب کیا گیا تھا۔ انہوں نے کہا کہ پولیس اور بم ڈسپوزل اسکواڈ کی بروقت کارروائی کے باعث ہنگو کو ممکنہ بڑی تباہی سے بچا لیا گیا۔

واقعے کے بعد علاقے میں سرچ آپریشن مزید تیز کر دیا گیا ہے جبکہ پولیس نے شہریوں سے اپیل کی ہے کہ کسی بھی مشکوک سرگرمی کی فوری اطلاع قانون نافذ کرنے والے اداروں کو دیں۔