یمنی فوج کے ڈرون حملے میں عبدالملک حوثی کے بھائی کا محافظ ہلاک

صنعاء(ڈیلی اردو) یمن کے صوبہ صعدہ میں یمنی مسلح افواج کے ڈرون حملے میں حوثی باغیوں کے ایک اہم کمانڈر حسین الہطفی ہلاک ہوگئے۔

مقامی ذرائع کے مطابق حسین الہطفی حوثی باغیوں کے سربراہ عبدالملک حوثی کے بھائی عبدالخالق حوثی کی ذاتی سکیورٹی پر مامور تھے۔ انہیں صعدہ کے علاقے میں حوثی باغیوں کے ٹھکانوں اور اجتماعات کو نشانہ بنانے والی کارروائی کے دوران ہلاک کیا گیا۔

ذرائع کا کہنا ہے کہ حسین الہطفی صعدہ کے ضلع ضحیان کے علاقے مجز سے تعلق رکھتے تھے۔ حوثی قیادت اور کارکنوں نے سوشل میڈیا پر ان کی ہلاکت کی تصدیق کرتے ہوئے ان کی تدفین کی تصاویر بھی جاری کیں۔

رپورٹس کے مطابق حسین الہطفی اپنے خاندان کے چوتھے فرد تھے جو جنگ کے آغاز کے بعد حوثی باغیوں کی صفوں میں ہلاک ہوئے۔