یمن: حوثی باغیوں کے حکومتی فورسز کے ٹھکانوں پر 14 بیلسٹک میزائلوں سے حملہ

صنعا(ڈیلی اردو) یمن کے مغربی ساحلی علاقوں میں حوثی باغیوں نے حکومتی فورسز کے ٹھکانوں پر بیلسٹک میزائلوں سے حملہ کیا، تاہم فوری طور پر جانی یا مالی نقصان کی تصدیق نہیں ہوسکی۔

یمنی ذرائع کے مطابق حوثی باغیوں نے صوبہ تعز کے شہر المخا اور صوبہ الحدیدہ کے ضلع الخوخہ کی جانب مجموعی طور پر 14 بیلسٹک میزائل فائر کیے۔ زیادہ تر میزائلوں کا رخ المخا شہر کی جانب تھا، جہاں حالیہ ہفتوں کے دوران ڈرون حملوں میں بھی شدت دیکھی گئی ہے۔

ذرائع کے مطابق حوثی باغیوں نے صوبہ الحدیدہ کے ضلع حیس کے مشرقی علاقے کو بھی بارودی مواد سے لیس ڈرون کے ذریعے نشانہ بنایا۔

میزائل حملوں کے ساتھ حوثی باغیوں نے صوبہ تعز میں الکدحہ اور البرح کے محور پر زمینی پیش قدمی کی کوشش بھی کی، تاہم یمنی حکومتی فورسز نے حملہ پسپا کرتے ہوئے حوثی عناصر کو پیچھے ہٹنے پر مجبور کردیا۔