10 میں سے 9 صحافیوں کی ہلاکتوں کا کوئی سراغ نہیں ملتا، انتونیو گوتریس

نیو یارک (ڈیلی اردو) اقوامِ متحدہ کے سیکریٹری جنرل انتونیو گوتریس نے کہا ہے کہ دنیا بھر میں صحافیوں کے قتل کے 10 میں سے تقریباً 9 واقعات تاحال غیر حل شدہ ہیں، جس کے باعث انصاف کا عمل بری طرح متاثر ہوتا ہے۔

اپنے بیان میں انہوں نے کہا کہ غزہ صحافیوں کے لیے کسی بھی جاری تنازع کے دوران سب سے خطرناک جگہ ثابت ہوئی ہے۔ انہوں نے ایک بار پھر آزاد اور غیر جانبدار تحقیقات کا مطالبہ کرتے ہوئے کہا کہ سزا کا نہ ملنا نہ صرف متاثرہ صحافیوں اور ان کے خاندانوں کے ساتھ ناانصافی ہے بلکہ صحافتی آزادی پر حملہ بھی ہے۔

انتونیو گوتریس کا کہنا تھا کہ سزا سے استثنیٰ مزید تشدد کو جنم دیتا ہے اور جمہوریت کے لیے خطرہ بنتا ہے، اس لیے تمام حکومتوں کو ہر کیس کی شفاف تحقیقات کر کے ذمہ داروں کو کٹہرے میں لانا چاہیے۔

انہوں نے کہا کہ حکومتوں کی ذمہ داری ہے کہ وہ اس بات کو یقینی بنائیں کہ صحافی ہر جگہ اپنے فرائض آزادانہ طور پر انجام دے سکیں۔ ’’جب صحافیوں کو خاموش کیا جاتا ہے تو ہم سب اپنی آواز کھو دیتے ہیں۔ آئیے ہم سب ایک ساتھ کھڑے ہو کر صحافتی آزادی کا دفاع کریں۔‘‘