بنوں: جدید کواڈ کاپٹر سے تھانے پر دہشتگرد حملہ، اہلکار محفوظ،

بنوں (ڈیلی اردو) خیبرپختونخوا کے حساس ضلع بنوں میں دہشتگردوں نے جدید ٹیکنالوجی کا استعمال کرتے ہوئے میرین پولیس اسٹیشن کو ایک بار پھر نشانہ بنایا، اس بار حملہ ایک بغیر پائلٹ کے کواڈ کاپٹر کے ذریعے کیا گیا، جس سے دھماکا خیز مواد تھانے کی حدود میں گرایا گیا۔

پولیس حکام نے حملے کی تصدیق کرتے ہوئے بتایا کہ یہ پچھلے ایک ماہ کے دوران اسی تھانے پر پانچواں حملہ ہے، جو سیکیورٹی اداروں کے لیے خطرے کی گھنٹی ہے۔ خوش قسمتی سے دھماکا خیز مواد تھانے کے صحن میں گرا اور کسی قسم کا جانی یا مالی نقصان نہیں ہوا۔

حملے کے وقت پولیس اہلکاروں نے کواڈ کاپٹر پر فائرنگ بھی کی، لیکن بلندی زیادہ ہونے کے باعث اسے نشانہ نہیں بنایا جا سکا۔ ذرائع کے مطابق اس طرز کے ٹیکنالوجی پر مبنی حملوں میں اضافہ ہو رہا ہے اور گزشتہ برسوں میں صوبے کے مختلف علاقوں میں کواڈ کاپٹر کے ذریعے بم گرائے جانے کے متعدد واقعات رپورٹ ہو چکے ہیں۔

حکام کا ماننا ہے کہ ان حملوں کے پیچھے کالعدم تحریک طالبان پاکستان (TTP) ملوث ہو سکتی ہے، جو جدید ذرائع استعمال کرتے ہوئے سیکیورٹی اداروں کو چیلنج کر رہی ہے۔ علاقے میں مزید حملوں کے خدشے کے پیش نظر سیکیورٹی سخت کر دی گئی ہے جبکہ حملے کی تحقیقات جاری ہیں۔