جرمنی: 15 سالہ شامی لڑکے پر بم حملے کی منصوبہ بندی کا مقدمہ

برلن (ڈیلی اردو) برلن میں ایک شامی نوعمر لڑکے پر اسلامک اسٹیٹ سے متاثرہ ایک سازش کے تحت گزشتہ موسمِ گرما میں ویانا میں ہونے والے ٹیلر سوئفٹ کنسرٹ پر حملے کی منصوبہ بندی میں ملوث ہونے کے الزام میں مقدمہ شروع ہو گیا ہے۔

وفاقی استغاثہ کے مطابق 15 سالہ ملزم، جس کی شناخت جرمن رازداری قوانین کے تحت محمد اے کے طور پر کی گئی ہے، پر "شدید تخریبی کارروائی کی تیاری" اور غیر ملکی دہشتگرد تنظیم کی معاونت کے الزامات عائد کیے گئے ہیں۔

الزام ہے کہ محمد اے نے ایک بم بنانے کی ویڈیو کو عربی سے ترجمہ کر کے 19 سالہ بیران اے کو بھیجا، جو مبینہ طور پر آسٹریا میں حملے کی سازش کا مرکزی ملزم تھا۔ مزید برآں، محمد اے پر داعش کے ایک رکن سے رابطہ قائم کروانے کا بھی الزام ہے۔

ٹیلر سوئفٹ کے ویانا میں شیڈول کنسرٹس کو گزشتہ اگست میں منسوخ کر دیا گیا تھا، جب حکام نے دو افراد کو عوامی اجتماع پر ممکنہ حملے کی منصوبہ بندی کے شبہ میں گرفتار کیا۔ آسٹریا کی وزارت داخلہ کے مطابق، 19 سالہ ملزم خودکشی کے ذریعے ایک بڑی بھیڑ کو ہلاک کرنے کا ارادہ رکھتا تھا۔

ٹیلر سوئفٹ نے اس ناکام حملے پر انسٹاگرام پر ردعمل دیتے ہوئے کہا کہ انہیں "خوف اور اپنے مداحوں کے لیے شدید جرم" کا احساس ہوا۔

محمد اے کو اسی روز گرفتار کیا گیا جب کنسرٹس منسوخ کیے گئے۔ وہ فرینکفرٹ آن ڈر اوڈر شہر کے ایک اسکول میں زیر تعلیم تھا اور جب یہ واقعہ پیش آیا، وہ صرف 14 سال کا تھا۔ اس کا نام بیران اے کے رابطہ افراد میں شامل پایا گیا۔

برلن کی اعلیٰ عدالت میں مقدمے کی سماعت کرنے والے جج نے، کم عمری اور میڈیا کی توجہ کے پیش نظر، مقدمے کو بند کمرے میں چلانے کی وکلا کی درخواست منظور کر لی۔ جج نے اس رائے سے اتفاق کیا کہ عوامی سماعت سے کم عمر ملزم کی بدنامی میں اضافہ ہو سکتا ہے۔

استغاثہ کے مطابق، محمد اے نے اپریل 2024 تک داعش کے نظریات کو قبول کر لیا تھا اور آسٹریا میں سازش میں ملوث افراد کو وفاداری کا حلف نامہ بھیجا تھا۔

جرمن حکام کے مطابق ملک میں دائیں بازو، بائیں بازو اور اسلامی انتہا پسندی کے زیر اثر کم عمر افراد کی شدت پسندی میں اضافہ ہو رہا ہے۔

مقدمے کی سماعت 26 اگست تک جاری رہنے کا امکان ہے۔ آسٹریا میں مرکزی ملزم ابھی بھی تفتیش کی زد میں ہے، ویانا کے پراسیکیوٹرز نے جرمن نیوز ایجنسی ڈی پی اے کو بتایا۔