آخری دہشتگرد کے خاتمے تک چین سے نہیں بیٹھیں گے، وزیراعظم شہباز شریف

پشاور (ڈیلی اردو) وزیراعظم شہباز شریف نے کہا ہے کہ دہشتگردی کے مکمل خاتمے تک جدوجہد جاری رہے گی اور آخری دہشتگرد کے خاتمے تک چین سے نہیں بیٹھیں گے۔ گورنر ہاؤس پشاور میں وزیراعظم کی زیر صدارت اعلیٰ سطح کے اجلاس میں خیبر پختونخوا کی سکیورٹی صورتحال، دہشتگردی کے خلاف جاری کارروائیوں اور امن و امان کی بہتری کے لیے کیے جانے والے اقدامات کا جائزہ لیا گیا۔ اجلاس میں دہشتگردی کے خلاف جنگ میں جانیں قربان کرنے والے مسلح افواج کے افسران و اہلکاروں، پولیس اور شہریوں کی قربانیوں کو خراجِ تحسین پیش کیا گیا۔

اجلاس میں فیلڈ مارشل عاصم منیر، وفاقی وزرا محسن نقوی، اعظم نذیر تارڑ، عطا اللہ تارڑ، امیر مقام اور رانا ثناء اللہ، گورنر خیبر پختونخوا فیصل کریم کنڈی، کور کمانڈر پشاور، چیف سیکریٹری خیبر پختونخوا، انسپکٹر جنرل پولیس اور دیگر اعلیٰ سول و سکیورٹی حکام نے شرکت کی۔ شرکا نے صوبے کی مجموعی سکیورٹی صورتحال، دہشتگردی کے خلاف اقدامات اور متعلقہ اداروں کے درمیان تعاون سے متعلق امور پر غور کیا۔

وزیراعظم شہباز شریف نے دہشتگردی کے خلاف جنگ میں سکیورٹی اداروں اور عوام کی قربانیوں کو سراہتے ہوئے اس عزم کا اظہار کیا کہ ان قربانیوں کو رائیگاں نہیں جانے دیا جائے گا۔ اجلاس میں خیبر پختونخوا پولیس، محکمہ انسدادِ دہشتگردی (سی ٹی ڈی) اور سیف سٹیز منصوبوں کی ضروریات پوری کرنے کے لیے وفاقی حکومت کے تعاون اور قانون نافذ کرنے والے اداروں کی استعداد بڑھانے پر بھی تبادلہ خیال کیا گیا۔

ذرائع کے مطابق دہشتگردی کے خلاف جنگ میں جانیں قربان کرنے والوں کے اہلخانہ کے لیے خصوصی امدادی پیکج کا اعلان بھی متوقع ہے، تاہم اس کی منظوری، مالی تفصیلات اور اعلان کے حوالے سے باضابطہ تصدیق سامنے نہیں آئی۔ اجلاس میں صوبے میں امن و امان کی صورتحال بہتر بنانے اور دہشتگردی کے مکمل خاتمے کے لیے مشترکہ کوششیں جاری رکھنے پر زور دیا گیا۔