اسرائیل نے 2026 کیلئے دفاعی بجٹ میں اربوں ڈالر کا اضافہ منظور کر لیا

یروشلم (ڈیلی اردو) اسرائیل کے وزیر دفاع کے دفتر نے جمعے کو بتایا ہے کہ 2026ء کے لیے اسرائیل کا دفاعی بجٹ 112 ارب شیکل (34.63 ارب ڈالر) مقرر کیا گیا ہے، جو کہ پہلے مسودے میں مختص کیے گئے 90 ارب شیکل سے زیادہ ہے۔

وزیر دفاع اسرائیل کاٹز اور وزیر خزانہ بیزلیل سموٹریچ نے دفاعی اخراجات کے فریم ورک پر اتفاق کیا ہے، جبکہ کابینہ اگلے سال کے بجٹ پر بحث شروع کر چکی ہے، جسے مارچ تک منظور کرنا ضروری ہے ورنہ نئے انتخابات کا امکان ہے۔

اسرائیلی وزراء نے جمعرات کو معمول کے مطابق طویل اجلاس شروع کیا تھا جبکہ آج بروز جمعہ اس حوالے سے ووٹنگ متوقع ہے۔

کاٹز نے کہا کہ فوج اپنے جنگجوؤں کی ضروریات پوری کرتی رہے گی اور ریزروسٹوں پر بوجھ کم کرے گی۔ ان کے دفتر سے جاری ہونے والے ایک بیان میں کہا گیا ہے، ’’ہم اسرائیلی فوج (آئی ڈی ایف) کو مضبوط بنانے اور جنگجوؤں کی ضروریات مکمل طور پر پوری کرنے اور ریزروسٹوں پر بوجھ کم کرنے کے لیے فیصلہ کن اقدامات جاری رکھیں گے تاکہ اسرائیلی ریاست کی ہر محاذ پر سلامتی یقینی بنائی جا سکے۔‘‘

غزہ جنگ اسرائیل کے لیے مہنگی ثابت ہوئی ہے جبکہ اسرائیل نے 2024ء میں حماس اورلبنان میں حزب اللہ کے ساتھ فوجی تنازعات پر 31 ارب ڈالر خرچ کیے۔

سموٹریچ کے دفتر نے کہا کہ 2026ء کا دفاعی بجٹ جنگ سے ایک روز قبل 2023ء کے مقابلے میں 47 ارب شیکل بڑھایا گیا ہے۔