اسرائیل و روس کی افواج پر قیدیوں کے ساتھ جنسی تشدد کے الزامات

نیو یارک (نمائندہ ڈیلی اردو) اقوامِ متحدہ نے جمعرات کے روز خبردار کیا ہے کہ اسرائیل اور روس کو ایسی افواج کی فہرست میں شامل کیا جا سکتا ہے جن پر تنازعات کے دوران جنسی تشدد کے الزامات ہیں۔ 

سیکرٹری جنرل انٹونیو گوٹیرش کی رپورٹ میں کہا گیا ہے کہ دونوں ممالک اس فہرست میں شامل ہونے کے خطرے سے دوچار ہیں، جس میں پہلے سے میانمار اور سوڈان کی فوجیں اور فلسطینی عسکری تنظیم حماس بھی شامل ہیں۔

رپورٹ کے مطابق اسرائیلی سکیورٹی فورسز اور روسی فوج کے اہلکاروں کے خلاف حراستی مراکز میں مبینہ جنسی تشدد کے واقعات درج کیے گئے، جن میں جنسی اعضا پر تشدد، طویل جبری برہنگی، بار بار تلاشی اور ذلت آمیز سلوک شامل ہیں۔ 

اسرائیلی فوج نے فروری میں پانچ فوجیوں کے خلاف ایک فلسطینی قیدی کے ساتھ جنسی تشدد کے الزامات کی تصدیق کی تھی۔

روس کی فوج پر بھی یوکرینی جنگی قیدیوں کے خلاف مبینہ جنگی قوانین کی خلاف ورزیوں کا الزام ہے، جنہیں 50 سرکاری اور 22 غیر سرکاری حراستی مراکز میں ریکارڈ کیا گیا۔ 

رپورٹس میں برقی جھٹکے دینا، مار پیٹ، جلانا اور زبردستی برہنہ کرنے جیسے مظالم شامل ہیں، جو تذلیل اور معلومات حاصل کرنے کے لیے استعمال کیے گئے۔