افغانستان : کم عمر لڑکیوں کے سر قلم کرکے لاشوں کو آگ لگا دی گئی

کابل(ڈیلی اردو) افغانستان کے صوبہ بادغیس میں دو کم عمر لڑکیوں کی لاشیں بند سبزک کے علاقے سے برآمد ہوئی ہیں، جن کے بارے میں مقامی ذرائع کا کہنا ہے کہ انہیں پہلے سر قلم کرکے قتل کیا گیا اور بعد میں لاشوں کو آگ لگائی گئی۔

ذرائع کے مطابق دونوں لڑکیوں کی عمریں تقریباً 8 اور 16 سال تھیں۔ ان کی لاشیں منگل کے روز بند سبزک کے علاقے سے ملیں، جس کے بعد انہیں صوبائی دارالحکومت قلعہ نو کے اسپتال منتقل کردیا گیا۔

تاحال دونوں لڑکیوں کی شناخت، قتل کے محرکات اور واقعے میں ملوث افراد کے بارے میں مزید تفصیلات سامنے نہیں آسکیں۔

یہ واقعہ ایسے وقت میں پیش آیا ہے جب افغانستان کے مختلف علاقوں میں جرائم اور پرتشدد واقعات کی اطلاعات سامنے آتی رہی ہیں۔ چند روز قبل صوبہ کنڑ میں بھی ایک نوجوان کی سر قلم لاش ملنے کی اطلاع دی گئی تھی۔

طالبان حکومت ملک بھر میں امن و امان کی صورتحال بہتر ہونے کا دعویٰ کرتی ہے، تاہم بعض علاقوں کے شہری جرائم، مسلح وارداتوں اور دیگر پرتشدد واقعات پر تشویش کا اظہار کرتے رہے ہیں۔