افغانستان: امریکی ڈرون حملے میں القاعدہ سربراہ ایمن الظواہری ہلاک

اسلام آباد (ش ح ط) افغانستان کے دارالحکومت کابل میں دہشت گرد تنظیم ’القاعدہ‘ کا سربراہ ایمن الظواہری امریکی ڈرون حملے میں مارا گیا ہے۔

ذرائع نے ڈیلی اردو کو بتایا کہ کابل کے سفارتی علاقے وزیر اکبر خان میں ایک مکان کو نشانہ بنایا گیا۔ ذرائع نے دعوی کیا ہے کہ ڈرون حملے میں ایمن الزواہری سمیت دس سے زائد افراد مارے گئے۔

ذرائع کے مطابق ایمن الظواہری کی ہلاکت سینٹرل انٹیلیجنس ایجنسی (سی آئی اے) کی طرف سے کیے گئے ڈرون حملے میں ہوئی ہے۔ یہ کاروائی اتوار کو کابل میں کی گئی تھی۔

ذرائع کے مطابق وزیر اکبر خان کے علاقے میں کئی سفارت خانے اور سینیئر سرکاری حکام کی رہائش گاہیں بھی ہیں۔

دوسری جانب طالبان کے ترجمان ذبیح اللّٰہ مجاہد نے امریکی حملے کی تصدیق کردی ہے۔

په کابل ښار د ډرون برید په اړه د اسلامي امارت د ویاند څرګندونيhttps://t.co/6hTyML1yXP pic.twitter.com/TpWYvvcT2v

— Zabihullah (..ذبـــــیح الله م ) (@Zabehulah_M33) August 1, 2022

ذبیح اللّٰہ مجاہد نے کہا ہے کہ امریکی کارروائی عالمی اصولوں کے خلاف ہے، جس کی مذمت کرتے ہیں۔

یاد رہے کہ القاعدہ کے سربراہ اسامہ بن لادن کو امریکہ کی سپیشل فورسز نے ایبٹ آباد میں 2 مئی2011 میں ایک آپریشن میں ہلاک کر دیا تھا۔ اور اس کے بعد الظواہری نے دہشتگرد قرار دیے جانے والی تنظیم کی قیادت سنبھال لی تھی۔