افغانستان: بدخشاں میں افغان فضائی حملوں میں ضلعی سربراہ سمیت 26 طالبان ہلاک

کابل (ڈیلی اردو) افغانستان کے شمالی صوبہ بدخشاں میں افغان فضائیہ کے حملوں میں طالبان کے فرضی ضلعی سربراہ سمیت کم از کم 26 دہشت گرد ہلاک اور 23 دیگر زخمی ہوگئے ہیں۔

افغان فوج کی 217 ویں پامیر کور کے عبدالہادی نے ان حملوں کی تصدیق کرتے ہوئے غیر ملکی خبر رساں ادارے شِنہوا کو بتایا کہ حملوں میں ضلع وردوج کے نواحی علاقوں میں اہداف کو کامیابی کے ساتھ نشانہ بنایا گیا۔

#Taliban’s shadow governor district for Warduj district of #Badakhshan province, Qari Haidar was killed with 21 of his fighters in airstrikes yesterday. In addition, 23 terrorists were wounded and 7 of their strongholds and hideouts were destroyed as a result of the strikes.

— Ministry of Defense, Afghanistan (@MoDAfghanistan) April 10, 2021

موصول ہونیوالی خفیہ اطلاعات کے مطابق وردوج میں طالبان کا فرضی ضلعی سربراہ قاری حیدر بھی ہلاک ہونے والے دہشت گردوں میں شامل ہے۔

انہوں نے کہا کہ طالبان کے ایک کمانڈ اینڈ کنٹرول مرکز اور دہشت گردوں کے 6 دفاعی ٹھکانوں کو بھی تباہ کر دیا گیا ہے، مزید بتایا کہ طالبان کا ٹھکانہ دور دراز علاقے میں واقع ہونے کی وجہ سے حملے میں کوئی بھی عام شہری متاثر نہیں ہوا۔

انہوں نے بتایا کہ بھاری مقدار میں اسلحہ اور گولہ بارود کو بھی تباہ کر دیا گیا ہے۔

طالبان نے ابھی تک ان خبروں پر کوئی تبصرہ نہیں کیا ہے۔