افغانستان: داعش خراسان کا ازبکستان پر راکٹ حملوں کا دعویٰ

کابل (ڈیلی اردو/وی او اے) داعش سے وابستہ گروپ خراسان نے پیر کے روز بتایا ہے کہ اس نے ازبکستان پر راکٹ سے حملہ کیا ہے۔ مشرقی ایشیائی ملک پر افغانستان سے ہونے والا اپنی نوعیت کا یہ پہلا حملہ ہے۔

داعش خراسان نے اپنے ایک بیان میں کہا ہے کہ اس نے ازبکستان کے ترمز کے قصبے میں واقع فوجی اڈے پر دس راکٹ فائر کیے۔ یہ علاقہ افغان سرحد کے نزدیک واقع ہے۔ازبک حکام نے داعش خراسان کے اس دعوے پر فوری طور پر کوئی ردعمل نہیں دیا۔

In First for Group, ISKP Claims Rocket Strike in Uzbekistan and Provides Video Documentation of Launch https://t.co/T4Elp42Doz pic.twitter.com/dQCevE8Zk2

— SITE Intel – Jihadist Threat (@siteintel_jt) April 18, 2022

اطلاعات کے مطابق ازبکستان پر حملے شمالی افغانستان کے صوبے بلخ میں حیرتان کے علاقے سے کیے گئے۔ گروپ نے اپنے دعوے کے ثبوت کے طور پر راکٹ میزائلوں کی تصاویر اور وڈیو بھی جاری کی ہے۔

داعش خراسان گروپ امریکی قیادت والے غیر ملکی فوجی اتحاد کے گزشتہ سال اگست میں افغانستان سے انخلا کے بعد ملک بھر میں اپنے حملوں میں تیزی لے آیا ہے۔

گروپ نے پڑوسی ملک پاکستان میں بھی متعدد حملے کیے ہیں۔ تازہ ترین حملہ گزشتہ ماہ پشاور میں اہل تشیع کی مسجد پر خود کش حملے کی صورت میں کیا گیا۔

اس حملے میں اقلیتی شیعہ مسلک کے 60 عبادت گزار ہلاک جب کہ متعدد زخمی ہوئے تھے۔ پاکستان کے حکام نے بتایا تھا کہ خود کش حملہ آور ایک افغان پناہ گزین تھا جس نے مبینہ طور پر افغانستان سے تربیت حاصل کر رکھی تھی۔