افغانستان سے جنوبی وزیرستان پر حملہ، خاتون سمیت 4 بچے زخمی

جنوبی وزیرستان (ڈیلی اردو رپورٹ) پاکستان کے شورش زدہ صوبہ خیبرپختونخوا کے قبائلی ضلع جنوبی وزیرستان کے علاقے انگور اڈہ میں شہری آبادی پر افغان طالبان کی جانب سے ایک بار پھر حملہ کیا گیا، جس کے نتیجے میں ایک خاتون اور چار بچے زخمی ہوگئے۔ پاک فوج نے فوری اور بھرپور جوابی کارروائی کرتے ہوئے افغان طالبان کی متعدد پوسٹوں کو نشانہ بنایا۔

سیکیورٹی ذرائع کے مطابق افغان طالبان فورسز نے انگور اڈہ سے ملحقہ سرحدی علاقوں میں بلااشتعال گولہ باری کی۔ افغانستان کی جانب سے فائر کیا گیا ایک مارٹر گولہ مقامی شہریوں کریم خان اور رحمت اللہ کے گھر پر آکر گرا، جس کے نتیجے میں چار بچے اور ایک خاتون شدید زخمی ہوگئے۔

ذرائع کا کہنا ہے کہ زخمیوں کو فوری طور پر ڈی ایچ کیو اسپتال وانا منتقل کر دیا گیا، جہاں انہیں طبی امداد دی جا رہی ہے۔

سیکیورٹی ذرائع نے بتایا کہ چند روز قبل بھی اسی علاقے میں افغانستان سے ہونے والی بلااشتعال فائرنگ کے نتیجے میں تین افراد زخمی ہوئے تھے۔

ذرائع کے مطابق افغان طالبان اور ان سے وابستہ خوارج عناصر مسلسل شہری آبادی کو نشانہ بنا رہے ہیں۔ بلااشتعال جارحیت کے جواب میں پاک فوج نے سرحدی علاقوں میں افغان طالبان کی متعدد پوسٹوں کو مؤثر انداز میں نشانہ بنایا، جس کے نتیجے میں طالبان اہلکار اپنی پوسٹیں چھوڑ کر فرار ہوگئے۔

سیکیورٹی ذرائع کا کہنا ہے کہ پاک فوج دفاعِ وطن کے لیے پرعزم ہے اور صرف عسکری اہداف کو نشانہ بنا رہی ہے، جبکہ آپریشن "غضب للحق" مقررہ اہداف کے حصول تک جاری رہے گا۔