افغانستان میں نیا عائلی قانون: اقوام متحدہ کی شدید تشویش

نیو یارک (ڈیلی اردو) اقوام متحدہ نے افغانستان میں طالبان حکومت کے نئے عائلی قانون پر شدید تشویش کا اظہار کرتے ہوئے کہا ہے کہ اس میں بچیوں کی شادی سے متعلق شقیں خواتین اور لڑکیوں کے خلاف تفریقی سلوک کو مزید مضبوط کرتی ہیں۔

افغان وزارتِ انصاف نے گزشتہ ہفتے ’’ازدواجی علیحدگی‘‘ سے متعلق حکم نامہ نمبر 18 جاری کیا، جس میں میاں بیوی کی علیحدگی کے اصول طے کیے گئے ہیں۔

اس قانون کی متنازع شقوں میں کہا گیا ہے کہ بلوغت کو پہنچنے والی لڑکی کی خاموشی کو شادی پر رضامندی تصور کیا جا سکتا ہے۔ اقوام متحدہ کے افغانستان مشن (یوناما) کے مطابق قانون میں ان لڑکیوں کی علیحدگی سے متعلق دفعات بھی شامل ہیں جو کم عمری میں شادی شدہ ہوں، جس سے یہ تاثر ملتا ہے کہ بچوں کی شادی کی اجازت موجود ہے۔

یوناما نے اپنے بیان میں کہا کہ یہ قانون افغانستان میں خواتین اور لڑکیوں کے حقوق محدود کرنے کے وسیع تر سلسلے کا حصہ ہے۔

اقوام متحدہ کی نائب خصوصی نمائندہ جورجیٹ گینون نے کہا کہ حکم نامہ نمبر 18 ایسے ماحول میں سامنے آیا ہے جہاں افغان خواتین کے حقوق مسلسل سلب کیے جا رہے ہیں۔

افغانستان میں پہلے ہی خواتین اور لڑکیوں پر سخت پابندیاں عائد ہیں۔ انہیں ثانوی اور اعلیٰ تعلیم، بیشتر ملازمتوں اور متعدد سماجی و تفریحی سرگرمیوں سے محروم رکھا گیا ہے، جبکہ لباس اور عوامی رویوں سے متعلق بھی سخت قوانین نافذ ہیں۔

یوناما کے مطابق اگرچہ نیا قانون خواتین کو شوہروں سے علیحدگی کا حق دیتا ہے، تاہم اس کے لیے پیچیدہ اور محدود قانونی راستے اختیار کرنا پڑتے ہیں، جبکہ مردوں کو یکطرفہ طور پر طلاق کا اختیار حاصل ہے۔

اقوام متحدہ کا کہنا ہے کہ یہ صورتحال خواتین کے بنیادی حقوق، خودمختاری، تحفظ اور وقار کو متاثر کرتی ہے۔

دوسری جانب طالبان حکومت نے اقوام متحدہ کے اعتراضات مسترد کرتے ہوئے کہا ہے کہ یہ قانون اسلامی شریعت کے مطابق بنایا گیا ہے اور افغانستان میں زبردستی شادی پہلے ہی ممنوع قرار دی جا چکی ہے۔