افغانستان: کابل میں داعش کا خودکش حملہ، چینی شہری سمیت 8 افراد ہلاک، 17 زخمی

کابل (نمائندہ ڈیلی اردو) افغان دارالحکومت کابل کے وسطی اور محفوظ سمجھے جانے والے علاقے شہرِ نو میں پیر 19 جنوری کو ہونے والے ایک خودکش حملے میں کم از کم آٹھ افراد ہلاک جبکہ 17 زخمی ہو گئے، جن میں ایک چینی شہری بھی شامل ہے۔

افغانستان میں ہسپتال چلانے والی اطالوی این جی او ایمرجنسی کے مطابق دھماکہ دوپہر کے وقت شہرِ نو میں ان کے سرجیکل سینٹر کے قریب پیش آیا۔ این جی او نے اپنے بیان میں کہا کہ دھماکے کے بعد 17 زخمیوں کو کابل میں قائم ایمرجنسی کے سرجیکل سینٹر منتقل کیا گیا، جبکہ آٹھ افراد زخموں کی تاب نہ لاتے ہوئے ہلاک ہو گئے۔

دوسری جانب طالبان کی وزارت داخلہ نے شہرِ نو میں خودکش دھماکے کی تصدیق کرتے ہوئے بتایا ہے کہ واقعے میں متعدد افراد ہلاک اور زخمی ہوئے ہیں۔ وزارت داخلہ کے ترجمان عبدالمتین قانع نے خبر رساں ادارے روئٹرز کو بتایا کہ ابتدائی تحقیقات کے مطابق یہ ایک خودکش حملہ تھا، تاہم واقعے کی مزید تفصیلات بعد میں جاری کی جائیں گی۔

روئٹرز کے مطابق شہرِ نو کا علاقہ کابل کے ان علاقوں میں شمار ہوتا ہے جہاں بڑی تعداد میں غیر ملکی شہری، سفارتی عملہ اور بین الاقوامی اداروں کے دفاتر موجود ہیں، اور اسے افغان دارالحکومت کے نسبتاً محفوظ ترین علاقوں میں سے ایک سمجھا جاتا ہے۔

بعد ازاں شدت پسند تنظیم داعش نے اس خودکش حملے کی ذمہ داری قبول کرنے کا دعویٰ کیا ہے۔ 

واقعے کے بعد سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے، جبکہ دھماکے کی نوعیت، ہدف اور حملہ آور سے متعلق تحقیقات جاری ہیں۔