امریکا نے سینئر ایرانی حکام اور اہلخانہ کے ویزا و مراعات منسوخ کر دیے

واشنگٹن (ش ح ط) امریکی وزارتِ خارجہ نے اعلان کیا ہے کہ سینئر ایرانی حکام اور ان کے اہلخانہ کو امریکہ میں داخلے کی اجازت نہیں دی جائے گی۔ یہ اقدام ایسے وقت میں سامنے آیا ہے جب ایران کے عوام اپنے بنیادی حقوق کے لیے جدوجہد جاری رکھے ہوئے ہیں۔

امریکی وزیر خارجہ مارکو روبیو کے مطابق، ایرانی حکومت کے وہ اعلیٰ عہدیدار اور ان کے خاندان، جو عوام پر جبر و تشدد سے فائدہ اٹھاتے ہیں، امریکی امیگریشن نظام سے فائدہ نہیں اٹھا سکتے۔

بیان میں مزید کہا گیا کہ ایرانی رجیم کی جانب سے ظالمانہ اقدامات اور انسانی حقوق کی پامالی ناقابلِ قبول ہیں، اور ایسے عناصر کو امریکہ میں قیام یا سہولتیں فراہم نہیں کی جا سکتیں۔

امریکی حکام نے اس فیصلے کو ایرانی عوام کے ساتھ یکجہتی اور انسانی حقوق کی حمایت کے عزم کے طور پر پیش کیا، جبکہ یہ ایران پر دباؤ بڑھانے کی امریکی پالیسی کا بھی حصہ ہے۔

اس سے قبل یورپی یونین نے ایران کی پاسداران انقلاب کو دہشت گرد تنظیم قرار دیتے ہوئے مظاہرین کے خلاف پرتشدد کریک ڈاؤن میں ملوث 15 اعلیٰ عہدیداروں پر پابندیاں عائد کی تھیں، جن میں پاسداران انقلاب کے اعلیٰ کمانڈر بھی شامل ہیں۔

یورپی یونین کی خارجہ پالیسی کی سربراہ کایا کالاس کے مطابق پاسداران انقلاب فورس کو القاعدہ، حماس اور داعش جیسے گروہوں کے برابر سمجھا جائے گا، کیونکہ اس نے ایران میں حکومت مخالف مظاہروں کو دبانے میں مرکزی کردار ادا کیا۔