امریکا کا ایران پر دوبارہ حملے کا امکان برقرار، پیٹ ہیگسیتھ کا انتباہ

واشنگٹن(ڈیلی اردو)امریکی وزیرِ جنگ پیٹ ہیگسیتھ نے کہا ہے کہ ایران کے خلاف فوجی کارروائی کا آپشن ختم نہیں ہوا اور اگر حالات نے ضرورت پیدا کی تو امریکا دوبارہ حملہ کرسکتا ہے۔

وسکونسن میں صحافیوں سے گفتگو کرتے ہوئے پیٹ ہیگسیتھ نے دعویٰ کیا کہ امریکا آبنائے ہرمز پر مکمل کنٹرول رکھتا ہے اور خطے میں تیل کی ترسیل بھی بحال ہوچکی ہے۔

امریکی وزیرِ جنگ کے مطابق تہران پر عائد سخت معاشی پابندیاں بھی اثرانداز ہورہی ہیں اور ایران کو شدید اقتصادی دباؤ کا سامنا ہے۔ ان کا کہنا تھا کہ موجودہ صورتحال میں ایران کے لیے مذاکرات کی جانب بڑھنا ہی بہتر راستہ ہے۔

پیٹ ہیگسیتھ نے واضح کیا کہ امریکا نے ایران کے خلاف ممکنہ فوجی کارروائی کا راستہ بند نہیں کیا، تاہم آئندہ کسی اقدام کا فیصلہ حالات اور ضرورت کو مدنظر رکھ کر کیا جائے گا۔

دوسری جانب امریکی میڈیا رپورٹس میں دعویٰ کیا گیا ہے کہ امریکی وزیر خارجہ مارکو روبیو نے حالیہ دنوں میں مختلف ممالک کے وزرائے خارجہ سے رابطوں کے دوران واضح کیا ہے کہ فی الحال ایران کے خلاف مزید امریکی حملے متوقع نہیں۔

رپورٹس کے مطابق واشنگٹن اس مرحلے پر فوجی کارروائی کے بجائے اقتصادی پابندیوں اور دیگر ذرائع سے ایران پر دباؤ بڑھانے کی حکمت عملی پر توجہ دے رہا ہے، جبکہ نئی پابندیوں کے ذریعے تہران پر مزید اقتصادی دباؤ ڈالنے کے اقدامات بھی کیے جا رہے ہیں۔