امریکا کا کابل میں ڈرون حملہ، ایک ہی خاندان کے 9 افراد ہلاک

کابل (بیورو رپورٹ) اتوار کو امریکہ کی جانب سے افغانستان میں دولت اسلامیہ داعش خراسان کے خلاف ایک فوجی کارروائی کی اطلاعات سامنے آئی ہیں۔

غیر ملکی خبر رساں ادارے روئٹرز کے مطابق امریکی فورسز نے اس فوجی کارروائی میں ایک ممکنہ خودکش بمبار کو نشانہ بنایا جو کار کے ذریعے کابل ایئرپورٹ پر حملہ کرنا چاہتا تھا۔

U.S. drone strike hits Islamic State car bomb in Kabul, officials say https://t.co/eo66WOcB8m pic.twitter.com/WoFvuY8Ab5

— Reuters (@Reuters) August 29, 2021

امریکی فوج کے سینٹرل کمانڈ کے ترجمان بل اربن کے مطابق امریکی فوج نے کابل میں ایک گاڑی پر دفاعی ڈرون حملہ کیا جس میں داعش خراسان کی جانب سے درپیش خطرے کو ختم کیا گیا۔

ان کا کہنا تھا کہ نشانہ بننے کے بعد گاڑی میں ہونے والے دھماکوں سے یہ واضح ہوتا ہے کہ اس میں کافی مقدار میں بارودی مواد موجود تھا۔

ان کے مطابق اس وقت اس حملے میں کسی سویلین کے نشانہ بننے کی کوئی خبر نہیں۔ تاہم عالمی میڈیا سی این این کے مطابق اس حملے میں ایک ہی خاندان کے چار بچوں سمیت 9 افراد ہلاک ہوگئے۔

Multiple members of the same family, including children, were killed in a US missile strike in Kabul, a relative of those killed tells CNNhttps://t.co/IUMjxwZhPe pic.twitter.com/pZO4f105XH

— CNN International (@cnni) August 29, 2021

قبل ازیں سابق افغان حکومت کے ایک سکیورٹی عہدیدار نے اے ایف پی کو بتایا تھا کہ ایئرپورٹ کے قریب دھماکہ راکٹ حملہ تھا اور ’ابتدائی اطلاعات کے مطابق اس کا نشانہ ایک مکان بنا ہے۔‘ 

https://twitter.com/MuslimShirzad/status/1432062947896008711?s=19

اے پی نے طالبان ترجمان ذبیح اللہ مجاہد کے حوالے سے بتایا کہ امریکہ نے فضائی حملے میں ایک خودکش بمبار کی گاڑی کو نشانہ بنایا۔ ان کا کہنا تھا کہ حملہ آور کابل ایئرپورٹ کو نشانہ بنانا چاہتا تھا۔

خیال رہے امریکا نے کابل ایئرپورٹ کے قریب ایک مخصوص، یقینی خطرے کے حوالے سے انتباہ کرتے ہوئے اپنے شہریوں پر زور دیا تھا کہ وہ علاقہ چھوڑ دیں۔

اے ایف پی کے مطابق فوری طور پر دہشت گردی کے انتباہ کے ایک سلسلے نے امریکی افواج کے زیر نگرانی انخلا کی کوششوں کو متاثر کیا اور انہیں طالبان کے ساتھ قریبی سکیورٹی تعاون پر مجبور کیا۔

خیال رہے کہ 2 روز قبل بھی کابل ائیرپورٹ دھماکوں سے گونج اٹھا تھا جس میں 13 امریکی فوجیوں اور 2 برطانوی شہریوں سمیت 175 سے زائد افغان شہری ہلاک ہوئے تھے، ان دھماکوں سے دو روز قبل امریکی صدر جوبائیڈن نے حملے کا الرٹ جاری کیا تھا۔

گذشتہ روز بھی امریکا کے صدر جوبائیڈن نے ایک بار پھر کابل ائیرپورٹ پر حملے کا خدشہ ظاہر کیا تھا۔

غیرملکی خبررساں ایجنسی کے مطابق امریکی صدر کا کہنا تھاکہ کابل ائیرپورٹ پر 24 سے 36 گھنٹوں کے دوران نئے حملے کا خدشہ ہے۔