امریکا: یمنی صدر کو استعفے پر سعودی عرب نے مجبور کیا، وال سٹریٹ جرنل کا دعویٰ

واشنگٹن (ڈیلی اردو/اے ایف پی/ڈی پی اے) امریکی جریدے وال سٹریٹ جرنل کے مطابق خانہ جنگی کے شکار ملک یمن کے صدر منصور ہادی کو سعودی عرب نے مستعفی ہونے پر مجبور کیا۔ اخبار کے مطابق ہادی اب ریاض میں اپنے گھر پر نظر بند ہیں اور ان کے رابطے محدود کیے جا چکے ہیں۔

واشنگٹن سے پیر اٹھارہ اپریل کو ملنے والی رپورٹوں کے مطابق وال سٹریٹ جرنل نے اپنی اتوار کی اشاعت میں انکشاف کیا کہ گزشتہ کئی برسوں سے خانہ جنگی کے شکار اور انتہائی غریب عرب ملک یمن کے بین الاقوامی سطح پر تسلیم شدہ صدر عبد ربو منصور ہادی نے سات اپریل کو اپنا جو استعفیٰ دیا تھا، اس کی وجہ سعودی عرب کے حکمرانوں کی طرف سے ڈالا جانے والا دباؤ تھا۔

یمن کی خانہ جنگی میں ان دنوں ایک ایسا وقفہ دیکھنے میں آ رہا ہے، جو پچھلے کئی برسوں سے بہت ہی کم دیکھنے میں آیا تھا۔ ان حالات میں صدر منصور ہادی نے گیارہ روز قبل اپنے عہدے سے استعفیٰ دیتے ہوئے اپنے اختیارات ایک نئی یمنی لیڈرشپ کونسل کے سپرد کرنے کا اعلان کر دیا تھا۔

ہادی کو ان کا تحریری حکم نامہ سعودی ولی عہد نے ہاتھ میں تھمایا

امریکی جریدے وال سٹریٹ جرنل نے نام لیے بغیر انتہائی قابل اعتماد سعودی اور یمنی ذرائع کا حوالہ دیتے ہوئے لکھا ہے کہ صدر منصور ہادی نے اپنے استعفے سے قبل جو صدارتی حکم نامہ جاری کیا تھا، وہ تحریری شکل میں انہیں سعودی ولی عہد محمد بن سلمان نے دیا تھا۔

قالت صحيفة وول ستريت جورنال الأميركية إن السعودية "دفعت" الرئيس اليمني عبد ربه منصور هادي إلى التنحي هذا الشهر، مضيفة إن السلطات السعودية "احتجزته" إلى حد كبير في منزله في الرياض و"قيدت" الاتصالات معه في الأيام التي تلت ذلك، وفقا لمسؤولين سعوديين ويمنيين تحدثوا للصحيفة. pic.twitter.com/KscD1b8tCl

— قناة الحرة (@alhurranews) April 18, 2022

اسی صدارتی حکم نامے میں ہادی نے اپنے اختیارات ایک ایسی نئی لیڈرشپ کونسل کے حوالے کرنے کا اعلان کیا تھا، جو یمن کے مختلف سیاسی گروپوں کے آٹھ نمائندوں پر مشتمل ہے۔

ذرائع کے مطابق چند سعودی حکام نے یہ دھمکی بھی دے دی تھی کہ اگر صدر منصوری ہادی نے اپنے عہدے سے مستعفی ہونے سے انکار کیا، تو وہ ان کی کرپشن کے ثبوت عام کر دیں گے۔ اس پر عبد ربو منصور ہادی کے پاس مبینہ طور پر استعفیٰ دے دینے کے سوا کوئی راستہ باقی نہیں بچا تھا۔

ہادی کی ریاض میں گھر پر نظر بندی

وال سٹریٹ جرنل کے مطابق سعودی اور یمنی حکام نے اس امر کی بھی مبینہ طور پر تصدیق کر دی ہے کہ استعفے کے بعد سے منصور ہادی سعودی عرب کے دارالحکومت ریاض میں اپنے گھر پر نظر بند ہیں۔ جریدے کے مطابق ان کی زندگی اب ان کی رہائش گاہ تک ہی محدود ہو کر رہ گئی ہے اور اسے گھر پر نظر بندی کے علاوہ کوئی دوسرا نام نہیں دیا جا سکتا۔

ایک سعودی اہلکار نے یہ تصدیق بھی کی کہ منصور ہادی کو ٹیلی فون تک رسائی بھی حاصل نہیں اور ان کے بیرونی دنیا کے ساتھ رابطے بھی انتہائی محدود کیے جا چکے ہیں۔ ایک دوسرے سعودی اہلکار نے وال سٹریٹ جرنل کو بتایا کہ ہادی کے مستعفی ہونے کی اس لیے بھی حوصلہ افزائی کی گئی کہ یمن کے مختلف جنگی فریق ملکی رہنما کے طور پر صدر منصور ہادی کی قیادت پر اعتماد کھو چکے تھے۔

استعفے کے بعد سعودی ردعمل

سرکاری طور پر سعودی عرب نے صدر منصور ہادی کے مستعفی ہو جانے کا خیر مقدم کیا تھا اور ساتھ ہی کئی برسوں کی خانہ جنگی سے تباہ حال یمن کے لیے تین بلین ڈالر کی امدا دکا اعلان بھی کر دیا تھا۔

منصور ہادی یمن کی بین الاقوامی سطح پر تسلیم شدہ حکومت کے سربراہ تھے اور ان کی قیادت میں ہی، سعودی سربراہی میں قائم عسکری اتحاد کی مدد سے، یمنی حکومت کی فورسز کئی سال تک ایران نواز حوثی باغیوں کے خلاف لڑتی رہی تھیں۔ سعودی عرب اپنی سربراہی میں قائم عسکری اتحاد کی صورت میں منصور ہادی کی حکومت کی حمایت میں یمن کی خانہ جنگی میں 2015ء میں شامل ہوا تھا۔

منصور ہادی یمن کے دارالحکومت صنعاء سمیت ملک کے وسیع تر علاقوں پر ایران نواز حوثی باغیوں کے قبضے کے بعد فرار ہو کر سعودی عرب چلے گئے تھے اور تب سے اب تک وہیں مقیم ہیں۔