امریکہ کے پاس پاکستان سے سٹریٹجک تعلقات بڑھانے کا موقع ہے، مارکو روبیو

واشنگٹن (ڈیلی اردو/نیوز ایجنسیاں) امریکہ کے وزیرِ خارجہ مارکو روبیو نے کہا ہے کہ امریکہ کے پاس پاکستان کے ساتھ اپنے سٹریٹیجک (تزویراتی) تعلقات کو وسعت دینے کا ایک موقع موجود ہے، اور یہ تعلقات بھارت کے ساتھ دوستی یا شراکت داری کی قیمت پر نہیں ہوں گے۔

روبیو نے یہ بات ہفتے کے روز واشنگٹن میں پریس بریفنگ کے دوران ایک سوال کے جواب میں کہی۔ ان سے پوچھا گیا تھا کہ آیا بھارت نے حالیہ دنوں میں امریکہ اور پاکستان کے درمیان بڑھتی ہوئی قربت پر کسی قسم کے خدشات کا اظہار کیا ہے۔

امریکی وزیرِ خارجہ نے کہا کہ بھارت کی جانب سے تاحال اس حوالے سے کوئی باضابطہ ردِعمل سامنے نہیں آیا ہے۔

انہوں نے کہا، ’’ہم جانتے ہیں کہ پاکستان اور بھارت کے درمیان تاریخی تناؤ کی وجہ سے ان کے پاس فکرمند ہونے کی وجوہات موجود ہیں، لیکن میرے خیال میں انھیں یہ سمجھنا ہوگا کہ ہمیں بہت سے مختلف ممالک کے ساتھ تعلقات قائم رکھنے ہوتے ہیں۔‘‘

روبیو نے کہا کہ امریکہ کو پاکستان کے ساتھ تعلقات میں وسعت کا ایک موقع دکھائی دیتا ہے اور واشنگٹن اس موقع سے فائدہ اٹھا رہا ہے۔ ان کے بقول، ’’یہی ہماری ذمہ داری ہے کہ ہم ایسے ممالک تلاش کریں جن کے ساتھ مشترکہ مفادات کے شعبوں میں کام کیا جا سکے۔‘‘

انہوں نے مزید کہا کہ ’’جہاں تک سفارتکاری کا تعلق ہے، بھارتی قیادت کافی سمجھدار ہے۔ ان کے بھی کچھ ایسے ممالک کے ساتھ تعلقات ہیں جن سے ہمارے تعلقات نہیں ہیں، لہٰذا یہ ایک بالغ اور عملی خارجہ پالیسی کا حصہ ہے۔‘‘

روبیو نے واضح کیا کہ امریکہ کے پاکستان کے ساتھ بڑھتے تعلقات کا مقصد بھارت کے ساتھ تعلقات کو کمزور کرنا نہیں ہے۔ انہوں نے کہا، ’’امریکہ اور بھارت کے تعلقات گہرے، تاریخی اور انتہائی اہم ہیں۔‘‘

ایک اور سوال کے جواب میں، امریکی وزیرِ خارجہ نے کہا کہ اسلام آباد کی جانب سے صدر ڈونلڈ ٹرمپ کے خطے میں امن اور خاص طور پر بھارت اور پاکستان کے درمیان ممکنہ جنگ کو روکنے کے کردار کو تسلیم کیے جانے سے تعلقات میں بہتری آئی ہے۔

ان کے بقول، ’’پاکستان نے اس بات کو سراہا ہے، اور جب آپ کسی کے ساتھ کام کرتے ہیں تو ایک دوسرے کو جاننے لگتے ہیں، جس سے ایک مثبت تعلق پیدا ہوتا ہے۔‘‘