ایران کے معاملے میں چین کی مدد کی ضرورت نہیں، امریکی صدر

واشنگٹن (ڈیلی اردو) امریکی صدر ڈونلڈ ٹرمپ نے کہا ہے کہ امریکہ کو ایران کے معاملے میں چین کی کسی مدد کی ضرورت نہیں اور واشنگٹن ہر صورت کامیابی حاصل کرے گا۔

منگل کے روز وائٹ ہاؤس میں صحافیوں سے گفتگو کے دوران ٹرمپ سے پوچھا گیا کہ آیا چینی صدر شی جنپنگ ایران کے معاملے میں مددگار ثابت ہو سکتے ہیں، جس پر انہوں نے جواب دیا کہ “نہیں، مجھے نہیں لگتا کہ ہمیں ایران کے معاملے میں کسی مدد کی ضرورت ہے۔ ہم کسی نہ کسی طریقے سے جیتیں گے، چاہے پُرامن طریقے سے یا کسی اور انداز میں۔”

امریکی صدر نے دعویٰ کیا کہ ایران کی بحریہ اور فضائیہ ختم ہو چکی ہے جبکہ اس کی جنگی مشین کا ہر حصہ تباہ کر دیا گیا ہے۔

ڈونلڈ ٹرمپ اس بیان کے بعد چین کے دورے پر روانہ ہو گئے جہاں ان کی چینی صدر شی جنپنگ سے ملاقات متوقع ہے۔

یاد رہے کہ دو روز قبل چین میں ایران کے سفیر عبدالرضا رحمانی فضلی نے کہا تھا کہ تہران اور واشنگٹن کے درمیان کسی بھی ممکنہ معاہدے کی ضمانت چین اور روس جیسی بڑی طاقتوں کو دینی چاہیے۔