باجوڑ میں سکیورٹی فورسز کا آپریشن، اہم کمانڈر سمیت چار دہشت گرد ہلاک

باجوڑ (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع باجوڑ میں سکیورٹی فورسز کے انٹیلی جنس بیسڈ آپریشن میں ایک اہم کمانڈر سمیت چار دہشت گرد ہلاک ہو گئے۔

سکیورٹی ذرائع کے مطابق یہ کارروائی مہمند کے قریب کیمور ٹاپ کے علاقے میں کی گئی، جہاں کالعدم تحریک طالبان پاکستان کے سینئر رکن اور کمانڈر خان فروش عرف زابل سمیت چار دہشت گردوں کو نشانہ بنایا گیا۔

ذرائع کا کہنا ہے کہ آپریشن خفیہ اطلاعات کی بنیاد پر کیا گیا، جس کے دوران مطلوب کمانڈر کو کامیابی سے ہلاک کیا گیا۔

واقعے کے بعد علاقے میں سرچ اینڈ کلیئرنس آپریشن شروع کر دیا گیا ہے۔

سکیورٹی حکام کے مطابق ہلاک دہشت گردوں کے نیٹ ورک اور ان کی سرگرمیوں کے بارے میں مزید تحقیقات جاری ہیں۔