بلوچستان: سیکیورٹی فورسز کا انٹیلی جنس بیس آپریشن، 2 فوجی کمانڈو اور 4 دہشت گرد ہلاک

راولپنڈی (ڈیلی اردو) صوبہ بلوچستان میں سیکیورٹی فورسز نے دہشت گردوں کے خلاف انٹیلی جنس بیس آپریشن کرتے ہوئے 4 دہشت گردوں کو ہلاک کردیا جبکہ آپریشن کے دوران دو فوجی بھی ہلاک ہوگئے۔

پاکستانی فوج کے شعبہ تعلقات عامہ (آئی ایس پی آر) بلوچستان کے علاقے شہرگ کے قریب کمن پاس میں فورسز کی جانب سے دہشت گردوں کی موجودگی کی خفیہ اطلاعات پر آپریشن کیا گیا۔

آئی ایس پی آر کا کہنا تھا کہ سیکورٹی فورسز کو دہشت گردوں کے ٹھکانے کے قریب ہیلی کاپٹر سے اتارا گیا، جس کے بعد سیکیورٹی فورسز نے راستے بند کرنا شروع کیے تو دہشت گردوں نے فورسز پر فائرنگ شروع کردی۔

دہشت گردوں کی فائرنگ کے نتیجے میں دو کمانڈو شفیع اللہ اور محمد قیصر موقع پر ہی ہلاک ہوگئے جب کہ جوابی فائرنگ میں 4 دہشت گرد بھی مارے گئے۔

آئی ایس پی آر کے جاری کردہ بیان میں کہا گیا ہے کہ دہشت گردوں سے دیسی ساختہ بم سمیت اسلحہ اور گولہ بارود کا ذخیرہ برآمد ہوا ہے، علاقے میں دہشت گردوں کو پکڑنے کے لیے کلیئرنس آپریشن جاری ہے۔