بلوچستان: لسبیلہ می فوجی قافلے پر بم حملہ، 11 سکیورٹی اہلکار ہلاک

کوئٹہ (ڈیلی اردو) شورش زدہ صوبہ بلوچستان کے ضلع لسبیلہ میں پاکستانی فوج کے قافلے پر بم حملے میں ایک جونیئر کمیشنڈ افسر (جے سی او) سمیت 11 سکیورٹی اہلکار ہلاک ہو گئے۔

ڈیلی اردو کو موصول ہونے والی اطلاعات کے مطابق لسبیلہ میں آر سی ڈی ہائی وے پر وال پٹ کے مقام پر کالعدم بلوچ لبریشن آرمی (بی ایل اے) نے پاکستانی فوج کے قافلے کو بم حملے کا نشانہ بنایا، جس کے نتیجے میں ایک جونیئر کمیشنڈ افسر (جے سی او) سمیت 11 سکیورٹی اہلکار ہلاک ہو گئے۔

پاک فوج کے شعبۂ تعلقاتِ عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری کے مطابق حملے میں 11 اہلکار ہلاک ہوئے، جبکہ سکیورٹی فورسز کی جوابی کارروائی میں 14 مبینہ دہشت گرد مارے گئے۔

گزشتہ 36 گھنٹوں کے دوران بلوچستان میں پولیس اور فوجی اہلکاروں پر کالعدم تحریک طالبان پاکستان (ٹی ٹی پی) اور بلوچ لبریشن آرمی (بی ایل اے) کے مختلف حملوں میں 40 سے زائد اہلکار ہلاک ہو چکے ہیں، جبکہ ہلاک ہونے والوں میں چار عام شہری بھی شامل ہیں۔

دوسری جانب سکیورٹی فورسز کی مختلف کارروائیوں میں مجموعی طور پر 54 مبینہ دہشت گرد ہلاک کیے گئے ہیں۔