بلوچستان: مرکزی شاہراہوں پر دہشت گردوں کا کنٹرول، ٹرالرز نذرِ آتش، پل تباہ

واشنگٹن (ش ح ط) پاکستان کے شورش زدہ صوبہ بلوچستان میں کالعدم بلوچ لبریشن آرمی (بی ایل اے) اور دیگر کالعدم بلوچ تنظیموں سے تعلق رکھنے والے مسلح افراد کی جانب سے مستونگ، خاران، نوشکی، دالبندین اور دیگر علاقوں میں مرکزی شاہراہوں پر ناکہ بندیاں قائم کرنے اور گاڑیوں کی تلاشی لینے کے واقعات رپورٹ ہوئے ہیں۔

اطلاعات کے مطابق واشک کے علاقے بسیمہ میں مسلح افراد نے ایک آئل ٹینکر کو آگ لگا کر تباہ کر دیا۔ اسی طرح مستونگ کے علاقے گرگینہ میں مرکزی شاہراہ پر کھڑے چار ٹرالرز کو نذرِ آتش کیے جانے کی بھی اطلاعات ہیں۔

خاران شہر اور ساراوان کے علاقوں میں بھی مسلح افراد نے خاران–کراچی مرکزی شاہراہ پر عارضی طور پر کنٹرول سنبھال کر اسنیپ چیکنگ کی، جبکہ نوروز قلات کے مقام پر خاران–کوئٹہ شاہراہ پر بھی ناکہ بندی کی گئی۔

دالبندین کے علاقے سورگل میں مرکزی پل کو بارودی مواد نصب کرکے تباہ کر دیا گیا، جس کے نتیجے میں ٹریفک کی آمد و رفت متاثر ہوئی۔ مقامی شہریوں کے مطابق دھماکے کی آواز دور دراز علاقوں تک سنی گئی۔

اسی طرح ضلع کچھی کے علاقے سنی میں رودی پل کو بھی دھماکے سے تباہ کیے جانے کی اطلاعات ہیں۔

ذرائع کے مطابق بعض مقامات پر مسلح افراد نے مرکزی شاہراہوں پر گاڑیوں کی تلاشی لی اور ٹریفک کو عارضی طور پر روک دیا، جس کے باعث مختلف علاقوں میں آمد و رفت متاثر ہوئی۔

سرکاری حکام کی جانب سے ان واقعات پر تاحال کوئی باضابطہ بیان سامنے نہیں آیا۔

ادھر اطلاعات کے مطابق کالعدم بلوچ لبریشن آرمی کی جانب سے ایک بیان میں دعویٰ کیا گیا ہے کہ کوئٹہ–تفتان روٹ سمیت متعدد مرکزی شاہراہیں ان کے کنٹرول میں ہیں۔