بلوچستان: مستونگ میں آپریشن "العزم" جاری، ہلاک دہشت گردوں کی تعداد 13 ہوگئی

کوئٹہ (نمائندہ ڈیلی اردو) پاکستان کے شورش زدہ صوبہ بلوچستان کے ضلع مستونگ میں سکیورٹی فورسز کی جانب سے جاری انٹیلی جنس بیسڈ آپریشن "العزم" کے دوران کارروائیاں جاری ہیں۔ سکیورٹی ذرائع کا کہنا ہے کہ تازہ کارروائی کے بعد ہلاک ہونے والے حملہ آوروں کی تعداد 13 ہو گئی ہے۔

سکیورٹی ذرائع کے مطابق مستونگ کے علاقے کھڈ کوچہ میں انٹیلی جنس اطلاعات کی بنیاد پر کیے گئے آپریشن کے دوران فورسز نے متعدد مقامات پر کارروائیاں کیں، جن میں مزید حملہ آور مارے گئے۔ ذرائع کے مطابق آپریشن کے آغاز سے اب تک مجموعی طور پر 13 افراد ہلاک ہو چکے ہیں۔

ذرائع کا کہنا ہے کہ کارروائی کے دوران کالعدم بلوچ لبریشن آرمی (بی ایل اے) کے مبینہ ٹھکانوں کو بھی نشانہ بنایا گیا، جہاں سے اسلحہ، گولہ بارود اور دیسی ساختہ بم (آئی ای ڈی) تیار کرنے کے لیے استعمال ہونے والا سامان برآمد کیا گیا۔

سکیورٹی ذرائع کے مطابق آپریشن کے دوران متعدد دیگر مسلح افراد کے زخمی ہونے کی بھی اطلاعات ہیں، تاہم زخمیوں کی تعداد یا ان کی شناخت کے بارے میں مزید تفصیلات جاری نہیں کی گئیں۔

ذرائع کے مطابق علاقے میں کلیئرنس اور سرچ آپریشن جاری ہے تاکہ ممکنہ طور پر موجود مزید مسلح افراد کو گرفتار یا ہلاک کیا جا سکے اور علاقے کو مکمل طور پر محفوظ بنایا جا سکے۔

سکیورٹی ذرائع کا کہنا ہے کہ بلوچستان میں دہشت گردی کے خاتمے اور امن و امان کے قیام تک انٹیلی جنس بیسڈ آپریشنز جاری رہیں گے، جبکہ سکیورٹی فورسز صوبے میں مسلح تنظیموں کے خلاف کارروائیاں مزید مؤثر انداز میں جاری رکھے ہوئے ہیں۔

آزاد ذرائع سے سکیورٹی ذرائع کے ان دعوؤں کی آزادانہ تصدیق نہیں ہو سکی، جبکہ کالعدم بلوچ لبریشن آرمی کی جانب سے بھی اس کارروائی پر تاحال کوئی ردعمل سامنے نہیں آیا ہے۔