بلوچستان: مستونگ میں لیویز تھانے پر حملہ، عمارت اور گاڑی نذرِ آتش، کوئٹہ دھماکے میں 2 بھائی ہلاک

کوئٹہ + مستونگ + ڈیرہ مراد جمالی (نمائندگان ڈیلی اردو) پاکستان کے شورش زدہ صوبے بلوچستان کے صوبائی دارالحکومت کوئٹہ کے نواحی علاقے ہنہ اوڑک میں ایک گاڑی کے قریب ہونے والے بم دھماکے میں قبائلی رہنما سردار عبداللہ بازئی کے دو بیٹے، عبدالسلام بازئی اور عبدالنافع بازئی ہلاک ہو گئے، جب کہ سات دیگر افراد زخمی ہو گئے۔ زخمیوں کو فوری طور پر قریبی اسپتال منتقل کر دیا گیا ہے۔

دوسری جانب ضلع مستونگ میں بلوچ مسلح دہشت گردوں نے لیویز فورس کے ولی خان تھانے پر حملہ کر کے عمارت کو آگ لگا دی۔ حملے کے نتیجے میں تھانے میں موجود ایک سرکاری گاڑی، اہم ریکارڈ اور دیگر املاک مکمل طور پر جل گئیں۔

مقامی ذرائع کے مطابق مسلح دہشت گردوں نے کوئٹہ-کراچی مرکزی شاہراہ پر چیک پوائنٹس قائم کر کے گاڑیوں کی اسنیپ چیکنگ کا سلسلہ شروع کر دیا ہے، جس کے باعث عوام میں خوف و ہراس پایا جا رہا ہے۔

ادھر ڈیرہ مراد جمالی میں تخریب کاروں نے سوئی گیس کی پائپ لائن کو دھماکہ خیز مواد سے تباہ کر دیا۔

سیکیورٹی فورسز نے تمام واقعات کے بعد علاقے کو گھیرے میں لے کر تحقیقات شروع کر دی ہیں، جبکہ حملہ آوروں کی تلاش کے لیے سرچ آپریشن جاری ہے۔