بلوچستان میں آپریشن شعبان، 85 شدت پسند ہلاک کرنے کا دعویٰ

اسلام آباد (ڈیلی اردو) پاکستانی سیکیورٹی فورسز نے دعویٰ کیا ہے کہ بلوچستان میں کالعدم تحریک طالبان پاکستان (ٹی ٹی پی) اور کالعدم بلوچ لبریشن آرمی (بی ایل اے) کے خلاف جاری آپریشن کے دوران 85 شدت پسند ہلاک کیے گئے ہیں۔

سیکیورٹی ذرائع کے مطابق آپریشن شعبان کے نام سے جاری کارروائی میں پاک فوج، فرنٹیئر کور بلوچستان اور پولیس حصہ لے رہی ہے۔ ذرائع کا کہنا ہے کہ آپریشن کے حالیہ مرحلے میں زمینی اور فضائی کارروائیوں کے دوران مزید 6 شدت پسند ہلاک کیے گئے۔

حکام کے مطابق سیکیورٹی فورسز نے شدت پسندوں کے مبینہ ٹھکانوں کو نشانہ بنایا جبکہ ایک گاڑی بھی تباہ کی گئی جو مبینہ طور پر شدت پسندوں کے زیر استعمال تھی۔ ایک الگ کارروائی میں مزید 2 شدت پسند ہلاک ہوئے، جس کے بعد آپریشن شعبان میں ہلاک ہونے والے شدت پسندوں کی مجموعی تعداد 85 ہوگئی۔

سیکیورٹی ذرائع نے مزید دعویٰ کیا کہ جولائی کے دوران آپریشن شعبان اور دیگر انٹیلی جنس بنیادوں پر کی جانے والی کارروائیوں میں اب تک ٹی ٹی پی کے 123 شدت پسند ہلاک کیے جا چکے ہیں۔ تاہم پاکستانی سیکیورٹی حکام کے ان دعوؤں کی آزاد ذرائع سے تصدیق نہیں ہوسکی۔

پاکستانی فوج عموماً ٹی ٹی پی کے جنگجوؤں کے لیے ’’خوارج‘‘ کی اصطلاح استعمال کرتی ہے جبکہ بلوچ مسلح گروہوں کو بھارتی حمایت یافتہ پراکسی تنظیمیں قرار دیتے ہوئے ان کے لیے ’’فتنہ الہندوستان‘‘ کی اصطلاح استعمال کرتی ہے۔ یہ اصطلاحات پاکستانی حکام کے سرکاری بیانیے کا حصہ ہیں۔