بلوچستان میں دہشت گردی کے واقعات میں 89 فیصد اضافہ ہوا، رپورٹ

کوئٹہ (مانیٹرنگ ڈیسک) بلوچستان میں دہشت گردی سے متعلق اعداد و شمار جاری کیے گئے ہیں جس کے مطابق سال 2021 کے دوران دہشت گردی کے واقعات میں 2020 کی نسبت 89 فیصد اضافہ ہوا۔

بلوچستان میں 2021 کے دوران دہشت گردی کے واقعات کی سالانہ رپورٹ جاری کی گئی ہے جس کے مطابق صوبے میں 2021 کے دوران دہشت گردی کے واقعات میں 2020 کی نسبت 89 فیصد اضافہ ہوا۔

محکمہ داخلہ بلوچستان کے ذرائع کے مطابق بلوچستان میں 2020 کے دوران دہشت گردی کے 137 واقعات رونما ہوئے تھے۔

محکمہ داخلہ ذرائع کا کہنا ہے کہ بلوچستان میں 2021 کے دوران دہشت گردی کے 260 واقعات رونما ہوچکے ہیں اور ان واقعات میں 138 افراد ہلاک جب کہ 421 افراد زخمی ہوئے۔

ذرائع کا کہنا ہے کہ رواں سال پولیس پر 13 حملے ہوئے جن میں 8 اہلکار ہلاک جب کہ 79 زخمی ہوئے۔

محکمہ داخلہ کا کہنا ہے کہ رواں سال لیویز پر 7 حملے ہوئے جن میں 6 اہلکار ہلاک جب کہ 5 زخمی ہوئے۔

اس کے علاوہ 37 آئی ڈی بم دھماکوں کے حملوں میں 20 افراد ہلاک جب کہ 74 زخمی ہوئے۔

محکمہ داخلہ بلوچستان کے ذرائع کا کہنا ہے کہ رواں سال دستی بم کے 36 حملے ہوئے جن میں 6 افراد ہلاک جب کہ 73 زخمی ہوئے ہیں۔

واضح رہے بلوچستان میں دہشت گر حملوں میں سیکیورٹی فورسز سمیت کئی افراد ہلاک جب کہ کئی افراد ان حملوں میں زخمی ہوچکے ہیں۔