بلوچستان میں فائرنگ، حملے اور دھماکہ، معروف تاجر سمیت 3 افراد ہلاک

کوئٹہ (ڈیلی اردو) پاکستان کے شورش زدہ صوبہ  بلوچستان کے دارالحکومت کوئٹہ سمیت مختلف علاقوں میں تشدد کے واقعات میں ایک معروف تاجر اور کراچی سے تعلق رکھنے والے ایک سیاح سمیت کم از کم تین افراد ہلاک جبکہ آٹھ افراد زخمی ہو گئے۔

کراچی سے تعلق رکھنے والا سیاح اپنے اہلِ خانہ کے ہمراہ ذاتی گاڑی میں سفر کر رہے تھے۔

کوئٹہ میں معروف تاجر ہاشم نورزئی کے قتل کا واقعہ بلیلی کے علاقے میں کسٹمز چیک پوسٹ کے قریب پیش آیا، جہاں نامعلوم مسلح افراد نے ان پر فائرنگ کر دی، جس کے نتیجے میں وہ موقع پر ہی ہلاک ہو گئے۔

واقعے کے خلاف مقتول کے لواحقین اور تاجروں نے بلیلی کے قریب شاہراہ پر لاش کے ہمراہ احتجاج کیا۔

وزیراعلیٰ بلوچستان میر سرفراز بگٹی نے واقعے کا نوٹس لیتے ہوئے ملزمان کی فوری گرفتاری کی ہدایت کی ہے۔ وزیراعلیٰ کے معاون برائے میڈیا شاہد رند کے مطابق تفتیش سیریس کرائمز انویسٹی گیشن ونگ کے سپرد کر دی گئی ہے۔

دوسری جانب کراچی سے تعلق رکھنے والے سیاح کی ہلاکت کا واقعہ ضلع مستونگ کے علاقے دشت میں پیش آیا۔ محکمہ داخلہ بلوچستان کے معاون برائے میڈیا بابر یوسفزئی کے مطابق ایک خاندان ذاتی گاڑی میں سیر کے لیے کوئٹہ آ رہا تھا، تاہم گوگل میپ کی غلط رہنمائی کے باعث وہ راستہ بھٹک کر دشت پہنچ گئے۔

انھوں نے بتایا کہ وہاں مبینہ طور پر کالعدم تنظیم سے وابستہ مسلح افراد نے گاڑی پر فائرنگ کی، جس کے نتیجے میں خاندان کے سربراہ علی جمیل ہلاک جبکہ ان کی اہلیہ زخمی ہو گئیں۔ خاتون کو چار گولیاں لگی ہیں اور وہ زیرِ علاج ہیں، جبکہ دونوں کمسن بچے محفوظ رہے ہیں۔

اب تک اس واقعے کی ذمہ داری کسی گروہ نے قبول نہیں کی۔

ادھر ضلع زیارت کے علاقے پراسپیکٹ پوائنٹ پر پولیس چوکی پر پہاڑوں سے مسلح افراد نے حملہ کیا۔ ایک مقامی پولیس اہلکار کے مطابق جوابی کارروائی کے دوران دیر تک فائرنگ کا تبادلہ جاری رہا۔

انھوں نے بتایا کہ اس وقت علاقے میں تبلیغی جماعت کے افراد اور پکنک منانے والے شہریوں کی بڑی تعداد موجود تھی۔ فائرنگ کے دوران تبلیغی جماعت سے تعلق رکھنے والے ایک شخص ہلاک جبکہ پولیس کے تین اہلکار زخمی ہو گئے۔

درایں اثناء ضلع مستونگ کے علاقے دشت میں پولیس کی ایک گاڑی کے قریب دھماکے کے نتیجے میں چار اہلکار معمولی زخمی ہو گئے۔