بلوچستان: نصیرآباد میں ریلوے ٹریک پر دھماکا، کوئٹہ میں گرلز اسکول کے قریب دستی بم حملہ

کوئٹہ/نصیرآباد (نمائندگان ڈیلی اردو) پاکستان کے شورش زدہ صوبے  بلوچستان کے مختلف علاقوں میں سیکیورٹی صورتحال ایک بار پھر تشویشناک ہو گئی ہے، جہاں نصیرآباد میں ریلوے ٹریک کو دھماکے سے نشانہ بنایا گیا جبکہ کوئٹہ کے مصروف علاقے میں گرلز اسکول کے قریب دستی بم پھینکے جانے کا واقعہ پیش آیا۔

بلوچستان کے ضلع نصیرآباد کے علاقے نوتال پولیس تھانے کی حدود میں قومی شاہراہ کے قریب نامعلوم افراد نے ریلوے ٹریک پر دھماکا خیز مواد نصب کر کے دھماکا کیا۔ 

پولیس ذرائع کے مطابق دھماکے سے ریلوے ٹریک کو جزوی نقصان پہنچا تاہم خوش قسمتی سے کسی قسم کا جانی یا مالی نقصان نہیں ہوا۔

پولیس کے مطابق دھماکے کی آواز دور دور تک سنی گئی، جس کے فوراً بعد پولیس اور سیکیورٹی فورسز کی بھاری نفری جائے وقوعہ پر پہنچ گئی۔ علاقے کی ناکہ بندی کر کے سرچ آپریشن شروع کر دیا گیا جبکہ ریلوے حکام نے متاثرہ حصے کی مرمت کا کام فوری طور پر شروع کر دیا۔ دھماکا اس وقت ہوا جب کوئی ٹرین وہاں سے گزر نہیں رہی تھی، جس کے باعث بڑا حادثہ ٹل گیا۔

دوسری جانب صوبائی دارالحکومت کوئٹہ کے مصروف علاقے جوائنٹ روڈ پر اس وقت خوف و ہراس پھیل گیا جب نامعلوم افراد نے گرلز اسکول کے قریب دستی بم پھینک دیا۔ پولیس حکام کے مطابق دستی بم خوش قسمتی سے پھٹ نہ سکا، جس کے باعث کسی جانی نقصان کی اطلاع نہیں ملی۔ حملہ آور دستی بم پھینکنے کے بعد موقع سے فرار ہو گئے۔

پولیس اور سیکیورٹی اداروں نے دونوں واقعات کی تحقیقات شروع کر دی ہیں جبکہ وزیراعلیٰ بلوچستان نے نصیرآباد دھماکے کا نوٹس لیتے ہوئے رپورٹ طلب کر لی ہے۔