بلوچستان: نوشکی میں بی ایل اے کا ٹارگٹ حملہ، سی ٹی ڈی کا ڈی ایس پی ہلاک

کوئٹہ (ڈیلی اردو) پاکستان کے شورش زدہ صوبہ بلوچستان کے ضلع نوشکی میں مسلح دہشت گردوں کی فائرنگ سے کاؤنٹر ٹیررازم ڈیپارٹمنٹ (سی ٹی ڈی) کا ایک افسر ہلاک ہوگیا۔

پولیس کے مطابق جمعرات کو موٹر سائیکل سوار دہشت گردوں نے نوشکی شہر کے علاقے احمدوال اسٹاپ پر سی ٹی ڈی کے ڈپٹی سپرٹنڈنٹ آف پولیس (ڈی ایس پی) کو نشانہ بنایا۔ فائرنگ کے نتیجے میں وہ موقع پر ہی ہلاک ہوگئے۔

ہلاک ہونے والے افسر کی شناخت محمد افضل محمد حسنی کے نام سے ہوئی ہے۔ 

واقعے کے بعد پولیس اور دیگر قانون نافذ کرنے والے اداروں نے علاقے کو گھیرے میں لے کر شواہد اکٹھے کیے اور حملہ آوروں کی تلاش کے لیے کارروائی شروع کردی۔

کالعدم تنظیم بلوچ لبریشن آرمی (بی ایل اے) نے حملے کی ذمہ داری قبول کرنے کا دعویٰ کیا ہے۔

وزیراعلیٰ بلوچستان کے معاون برائے میڈیا و سیاسی امور شاہد رند نے واقعے پر افسوس کا اظہار کرتے ہوئے کہا کہ محمد افضل محمد حسنی نے صوبے میں امن و امان کے قیام کے لیے قابلِ قدر خدمات انجام دیں۔

انہوں نے بتایا کہ وزیراعلیٰ بلوچستان میر سرفراز بگٹی نے واقعے کا نوٹس لیتے ہوئے متعلقہ اداروں کو فوری تحقیقات، حملہ آوروں کی گرفتاری اور واقعے میں ملوث عناصر کو قانون کے کٹہرے میں لانے کے لیے تمام ضروری اقدامات کی ہدایت جاری کی ہے۔

حکام کے مطابق قانون نافذ کرنے والے ادارے واقعے کے مختلف پہلوؤں کا جائزہ لے رہے ہیں جبکہ حملہ آوروں کی تلاش اور واقعے کی تحقیقات جاری ہیں۔