بلوچستان: نوشکی میں جھڑپیں، 7 کمانڈوز اور 4 عسکریت پسند ہلاک

کوئٹہ (ڈیلی اردو) پاکستان کے شورش زدہ صوبے بلوچستان کے ضلع نوشکی میں مسلح عسکریت پسندوں اور سکیورٹی فورسز کے درمیان ہونے والی جھڑپوں میں اینٹی ٹیررازم فورس (اے ٹی ایف) کے سات کمانڈوز اور چار حملہ آور ہلاک ہو گئے۔

نوشکی ان شہروں میں شامل تھا جہاں 31 جنوری کو مسلح حملہ آور داخل ہوئے اور سرکاری تنصیبات سمیت مختلف مقامات کو نشانہ بنایا۔ دیگر متاثرہ شہروں کے مقابلے میں نوشکی میں مسلح حملہ آوروں کی موجودگی تین روز تک برقرار رہی، جو سب سے طویل دورانیہ تھا۔

سرکاری حکام کے مطابق ان تین دنوں کے دوران شہر کے مختلف علاقوں میں بلوچ عسکریت پسندوں اور سکیورٹی فورسز کے درمیان متعدد جھڑپیں ہوئیں۔

فون پر رابطہ کرنے پر ایک پولیس اہلکار نے نام ظاہر نہ کرنے کی شرط پر بتایا کہ ان جھڑپوں کے دوران اے ٹی ایف کے کم از کم سات اہلکار ہلاک ہوئے جبکہ چار مسلح حملہ آور بھی مارے گئے۔

پولیس اہلکار کے مطابق منگل کی صبح سے شہر میں صورتحال بتدریج معمول پر آنا شروع ہو گئی ہے اور بازار دوبارہ کھل گئے ہیں۔