بلوچستان: پنجگور بازار میں دھماکا، ایک شخص ہلاک، 13 زخمی

کوٹٹہ (نمائندہ ڈیلی اردو) پاکستان کے شورش زدہ صوبے بلوچستان کے ضلع پنجگور کے علاقے چتکان بازار میں زور دار دھماکا ہوا ہے، جس کے نتیجے میں ایک شخص ہلاک جبکہ کم از کم 9 افراد زخمی ہو گئے ہیں، جن میں سے تین کی حالت تشویشناک بتائی جا رہی ہے۔

پولیس کے مطابق دھماکا بازار کے مصروف حصے میں اس وقت ہوا جب شہری خریداری میں مصروف تھے۔ دھماکے کی شدت کے باعث قریبی دکانوں کے شیشے ٹوٹ گئے جبکہ متعدد موٹر سائیکلوں کو بھی نقصان پہنچا۔

ابتدائی تحقیقات کے مطابق دھماکا خیز مواد ایک موٹرسائیکل میں نصب کیا گیا تھا، جسے بازار کے قریب کھڑا کیا گیا تھا۔ دھماکے کے فوراً بعد علاقے میں شدید خوف و ہراس پھیل گیا اور لوگ اپنی جان بچانے کے لیے اِدھر اُدھر بھاگتے دکھائی دیے۔

واقعے کی اطلاع ملتے ہی پولیس، ایف سی اور ریسکیو ٹیمیں موقع پر پہنچ گئیں، جنہوں نے علاقے کو گھیرے میں لے کر سرچ آپریشن شروع کر دیا۔ زخمیوں کو فوری طور پر قریبی اسپتال منتقل کیا گیا، جہاں ڈاکٹروں کے مطابق تین زخمیوں کی حالت تشویشناک ہے۔

ہلاک ہونے والے شخص کی شناخت کا عمل جاری ہے جبکہ زخمیوں میں عام شہری شامل ہیں۔

پولیس کا کہنا ہے کہ دھماکے کی نوعیت اور اس میں استعمال ہونے والے مواد کا تعین کیا جا رہا ہے۔ شواہد اکٹھے کر کے تحقیقات کا دائرہ وسیع کر دیا گیا ہے جبکہ سی سی ٹی وی فوٹیج بھی حاصل کی جا رہی ہے۔

دھماکے کے بعد چتکان بازار اور اطراف کے علاقوں میں سیکیورٹی مزید سخت کر دی گئی ہے  تاحال کسی گروہ نے دھماکے کی ذمہ داری قبول نہیں کی۔