بلوچستان: کیچ کے علاقے ہوشاب میں سکیورٹی فورسز کا آپریشن، 4 دہشت گرد ہلاک

راولپنڈی (ڈیلی اردو) صوبہ بلوچستان کے ضلع کیچ کے علاقے ہوشاب میں سیکیورٹی فورسز نے کارروائی کرتے ہوئے 4 دہشت گردوں کو ہلاک کردیا۔

پاکستانی فوج کے شعبہ تعلقات عامہ (آئی ایس پی آر) کے مطابق ہوشاب کے علاقے تلسر میں ایم 8 شاہراہ پر دیسی ساختہ بم نصب کرنے کے علاوہ سکیورٹی فورسز اور شہریوں پر فائرنگ کے واقعات میں ملوث دہشت گردوں کے ٹھکانے کو نشانہ بنانے کے لیے انٹیلی جنس بیسڈ آپریشن شروع کیا گیا۔

علاقے کی مسلسل انٹیلی جنس، سرویلنس اور جاسوسی کے نتیجے میں دہشت گردوں کے مقام کی نشاندہی کی گئی اور سکیورٹی فورسز کو ہیلی کاپٹر کے ذریعے داخل کیا گیا۔اس دوران دہشت گردوں نے فرار ہونے کی کوشش کی تاہم سکیورٹی فورسز کی طرف سے دہشت گردوں کے فرار ہونے والے راستوں کی ناکہ بندی کردی گئی۔

کارروائی کے دوران 4 دہشت گردوں نے سیکیورٹی فورسز پر فائرنگ کردی اور شدید فائرنگ کے تبادلے کے دوران چاروں دہشت گرد مارے گئے، جب کہ دیسی ساختہ بموں سمیت اسلحہ اور گولہ بارود کا ذخیرہ برآمد کر لیا گیا۔