بلوچستان کے تین اضلاع سے سات افراد کی تشدد زدہ لاشیں برآمد

کوئٹہ (ڈیلی اردو) پاکستان کے شورش زدہ صوبہ بلوچستان کے مختلف علاقوں سے سات افراد کی تشدد زدہ لاشیں برآمد ہوئی ہیں۔ سرکاری حکام کے مطابق لاشیں قلات، سوراب اور خاران کے اضلاع سے ملی ہیں جنہیں شناخت اور قانونی کارروائی کے لیے ہسپتال منتقل کر دیا گیا ہے۔

حکام کے مطابق ضلع قلات سے تین افراد کی لاشیں برآمد ہوئیں۔ قلات پولیس کے سربراہ زاہد شاہ نے بتایا کہ دو لاشیں ریج کے علاقے جبکہ ایک لاش چھپر کے مقام سے ملی۔

پولیس حکام کے مطابق ابتدائی تحقیقات سے معلوم ہوا ہے کہ تینوں افراد کو گولیاں مار کر قتل کیا گیا جبکہ ان پر تشدد کے شواہد بھی موجود ہیں۔ حکام کا کہنا ہے کہ تاحال تینوں افراد کی شناخت نہیں ہو سکی اور لاشیں شناخت کے لیے ہسپتال منتقل کر دی گئی ہیں۔

اسی طرح قلات سے ملحقہ ضلع سوراب سے بھی مزید تین افراد کی لاشیں برآمد ہوئی ہیں۔

سوراب پولیس کے ایک اہلکار نے نام ظاہر نہ کرنے کی شرط پر بتایا کہ تینوں افراد کی موت گولیاں لگنے سے ہوئی۔ ان کے مطابق ابھی تک یہ معلوم نہیں ہو سکا کہ انہیں کہاں اور کن حالات میں قتل کیا گیا۔

پولیس اہلکار کے مطابق سوراب منتقل کی گئی لاشوں کی بھی شناخت نہیں ہو سکی، جبکہ ان کے چہروں پر گولیوں کے نشانات موجود تھے۔

خاران سے اغوا کے بعد ایک شخص کی لاش برآمد

ساتویں لاش ضلع خاران میں سی پیک روڈ کے قریب سے برآمد ہوئی، جس کی شناخت حافظ کبیر ایجباڑی کے نام سے ہوئی ہے۔

سرکاری حکام کے مطابق حافظ کبیر کو چند روز قبل نامعلوم مسلح افراد نے ان کے گھر پر حملے کے بعد اغوا کیا تھا۔ 

پولیس کے مطابق اس حملے میں حافظ کبیر کا ایک بیٹا بھی ہلاک ہو گیا تھا، جبکہ مسلح افراد حافظ کبیر اور ان کے دوسرے بیٹے کو اپنے ساتھ لے گئے تھے۔

پولیس کے مطابق دو روز بعد حافظ کبیر کی لاش سی پیک روڈ کے قریب سے ملی، جبکہ ان کے دوسرے بیٹے کے بارے میں تاحال کوئی معلومات سامنے نہیں آ سکی ہیں۔

بلوچستان میں ماضی کے دوران بھی مختلف علاقوں سے لاشیں ملنے کے واقعات رپورٹ ہوتے رہے ہیں، جن میں بعض اوقات مسلح گروہوں اور دیگر عناصر پر الزامات عائد کیے جاتے ہیں، تاہم متعدد واقعات کی آزادانہ طور پر تصدیق نہیں ہو پاتی۔