بلوچستان کے حملوں پر اقوام متحدہ کی سلامتی کونسل کا سخت موقف

نیو یارک (ڈیلی اردو) اقوام متحدہ کی سلامتی کونسل نے پاکستان کے جنوب مغربی صوبہ بلوچستان میں عسکریت پسندوں کے حالیہ حملوں کی سخت الفاظ میں مذمت کی ہے، جن میں عام شہریوں سمیت درجنوں افراد ہلاک ہوئے۔ ادھر بدھ کے روز سکیورٹی فورسز نے شورش زدہ علاقے میں اپنی کارروائیاں جاری رکھیں۔

پاکستانی حکام کے مطابق حالیہ دنوں میں صوبہ بلوچستان میں  سکیورٹی فورسز کی کارروائیوں میں درجنوں عسکریت پسند مارے گئے ہیں۔ خیال رہے عسکریت پسندوں نے ہفتہ 31 جنوری کو تقریباً ایک درجن مربوط حملوں میں شہریوں اور پولیس و سکیورٹی اہلکاروں کی عمارتوں کو نشانہ بنایا۔

رات گئے جاری بیان میں اقوام متحدہ کی سلامتی کونسل کے صدر جیمز کاریوکی نے کہا کہ کونسل کے ارکان نے بلوچستان کے مختلف علاقوں میں ہونے والے ’’مکروہ اور بزدلانہ دہشت گرد حملوں‘‘ کی شدید ترین الفاظ میں مذمت کی اور متاثرین کے اہل خانہ اور حکومت اور پاکستان کے عوام سے تعزیت کا اظہار کیا۔

وفاقی اور صوبائی حکام نے بتایا کہ شدت پسندوں کے حملوں میں کم از کم 36 شہری اور سکیورٹی فورسز کے 17 اہلکار ہلاک ہوئے۔ سکیورٹی فورسز اب تک کالعدم بلوچ لبریشن آرمی کے 197 عسکریت پسندوں کو ہلاک کر چکی ہیں، جس نے حالیہ خودکش دھماکوں اور فائرنگ کے حملوں کی ذمہ داری قبول کی۔

بلوچستان طویل عرصے سے نسلی بلوچ گروہوں کی علیحدگی پسند شورش کا شکار ہے جو پاکستان کی مرکزی حکومت سے زیادہ خودمختاری یا آزادی چاہتے ہیں۔ پاکستان کا کہنا ہے کہ اس نے شورش پر قابو پا لیا ہے، تاہم تشدد کے واقعات جاری ہیں۔