بلوچستان: گوادر میں کوسٹ گارڈز کے کیمپ پر خودکش حملہ، 5 اہلکار ہلاک، متعدد زخمی

واشنگٹن ڈی سی (ش ح ط) پاکستان کے شورش زدہ صوبہ بلوچستان کے ساحلی ضلع گوادر کی تحصیل جیوانی میں پاکستان کوسٹ گارڈز کے ایک کیمپ پر بارودی مواد سے بھری گاڑی کے ذریعے خودکش حملہ کیا گیا، جس کے نتیجے میں حکام کے مطابق کم از کم پانچ سکیورٹی اہلکار ہلاک جبکہ ایک درجن سے زائد زخمی ہو گئے۔

سرکاری ذرائع کے مطابق حملہ جمعے کی شام جیوانی کے علاقے پانوان میں اس وقت کیا گیا جب ایک خودکش حملہ آور نے بارود سے بھری گاڑی سکیورٹی فورسز کے کیمپ سے ٹکرا دی، جس کے نتیجے میں زور دار دھماکا ہوا اور کیمپ کے متعدد حصوں کو نقصان پہنچا۔

گوادر سے موصول ہونے والی اطلاعات کے مطابق متعدد زخمی اہلکاروں کی حالت تشویشناک بتائی جا رہی ہے، جس کے باعث ہلاکتوں کی تعداد میں اضافے کا خدشہ ظاہر کیا جا رہا ہے۔

حکام کا کہنا ہے کہ دھماکے کے فوراً بعد پولیس، لیویز اور دیگر قانون نافذ کرنے والے اداروں کے اہلکار جائے وقوعہ پر پہنچ گئے۔ زخمیوں کو فوری طور پر قریبی ہسپتال منتقل کیا گیا جبکہ شواہد اکٹھے کرکے تحقیقات کا آغاز کر دیا گیا ہے۔

پاکستانی حکام کی جانب سے تاحال اس حوالے سے کوئی تفصیلات جاری نہیں کی گئیں۔

دریں اثنا، کالعدم بلوچ لبریشن آرمی (بی ایل اے) کی مجید بریگیڈ نے حملے کی ذمہ داری قبول کرنے کا دعویٰ کیا ہے۔

بی ایل اے کے ترجمان نے ڈیلی اردو کو ای میل کے ذریعے بھیجے گئے ایک بیان میں دعویٰ کیا ہے کہ خودکش حملے میں 30 سے زائد اہلکار ہلاک ہوئے ہیں۔

بیان کے مطابق حملہ بی ایل اے کی مجید بریگیڈ سے تعلق رکھنے والے عطاء اللہ بلوچ عرف اجمل نے بارودی مواد سے بھری گاڑی کے ذریعے کیا۔

تاہم، سرکاری ذرائع اس سے کم جانی نقصان کی اطلاعات دے رہے ہیں۔