بنوں: جانی خیل ڈرون حملے میں بچوں سمیت پانچ افراد زخمی

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں کے نیم قبائلی علاقے جانی خیل میں مبینہ کاپٹر ڈرون حملے کے نتیجے میں بچوں سمیت پانچ افراد شدید زخمی ہو گئے۔ زخمیوں کو فوری طور پر ہسپتال منتقل کر دیا گیا۔

نمائندہ ڈیلی اردو کے مطابق واقعے کی اطلاع مقامی حکام نے دی ہے، جنہوں نے کہا کہ حملے میں شہری متاثر ہوئے ہیں۔

ایمنسٹی انٹرنیشنل کے مطابق مارچ 2025 سے اب تک خیبر پختونخوا میں کئی ڈرون حملے ہو چکے ہیں، جن میں کم از کم پانچ حملے شہریوں کی ہلاکت یا زخمی ہونے کا سبب بنے ہیں۔ قابل ذکر واقعات میں شامل ہیں:

29 مارچ: مردان کے علاقے کتلانگ پر حملہ، 11 افراد ہلاک۔

19 مئی: شمالی وزیرستان کے علاقے میر علی، حرمز میں حملہ، چار بچے ہلاک اور پانچ زخمی۔

28 مئی: جنوبی وزیرستان کے علاقے وانا میں والی بال میچ کے دوران حملہ، 22 زخمی جن میں سات بچے شامل۔

20 جون: جنوبی وزیرستان کی تحصیل مکین، گاؤں ڈشکہ میں حملہ، ایک بچہ ہلاک اور پانچ زخمی۔

مزید برآں، شمالی وزیرستان کے گاؤں موسکی اور جنوبی وزیرستان کے برمل میں بھی ڈرون یا کواڈ کاپٹر حملے ہوئے، جن میں زخمی ہونے والے بچوں کے والدین نے ڈیلی اردو کو بتایا کہ بچے ڈر کے مارے بھاگنے کی کوشش کر رہے تھے، مگر حملے کا شکار ہو گئے۔