بنوں: سیکورٹی فورسز پر حملے کی کوشش ناکام، خودکش بمبار قبل از وقت پھٹ گیا

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع بنوں میں بنوں–کوہاٹ روڈ پر ایک مبینہ خودکش بمبار نے خود کو دھماکے سے اُڑا لیا، تاہم خوش قسمتی سے واقعے میں کوئی جانی نقصان نہیں ہوا۔

سرکاری ذرائع کے مطابق دھماکا تھانہ بسہ خیل کی حدود میں واقع دواغوڑا پل کے قریب اُس وقت ہوا جب ایک خودکش حملہ آور نے خود کو دھماکے سے اڑا دیا۔

پولیس کے مطابق موٹر سائیکل سوار مبینہ خودکش حملہ آور نے خود کو دھماکے سے اُڑا لیا۔

ذرائع کا مزید کہنا ہے کہ خودکش بمبار کا ہدف پولیس اور سیکیورٹی فورسز تھیں، تاہم وہ اپنے اہداف تک پہنچنے سے قبل ہی پھٹ گیا۔

دھماکے کے بعد سیکیورٹی فورسز نے علاقے کو گھیرے میں لے کر شواہد اکٹھے کرنے اور تحقیقات کا عمل شروع کر دیا ہے۔