بنوں میں ایم پی اے شیر اعظم وزیر کے گھر کے باہر رکھا بم ناکارہ بنا دیا گیا

بنوں (ڈیلی اردو) خیبر پختونخوا اسمبلی کے رکن شیر اعظم وزیر کے گھر کے باہر رکھا گیا بم ناکارہ بنادیا گیا۔

تفصیلات کے مطابق قانون نافذ کرنے والے اداروں نے صوبہ خیبر پختونخوا کے ضلع بنوں میں دہشت گردی کی کوشش ناکام بنادی، اور پاکستان پیپلز پارٹی کے ایم پی اے شیر اعظم وزیر کے گھر کے باہر رکھا گیا بم ناکارہ بنادیا گیا۔

پولیس حکام کے مطابق ایم پی اے شیر اعظم وزیر کے گھر کے باہر گیٹ کے پاس 4 کلو گرام بم رکھا گیا تھا، تاہم بم کی اطلاع ملتے ہی بم ڈسپوزل اسکوارڈ اور پولیس کی ٹیمیں موقع پر پہنچ گئیں۔ اور بم کو ناکارہ بنا دیا گیا۔

پولیس حکام کا کہنا ہے کہ بروقت کارروائی کی وجہ سے خوش قسمتی سے کوئی جانی نقصان نہیں ہوا، تاہم سی سی ٹی وی فوٹیج اور شواہد اکھٹے کرکے تخریب کاری کاروں کو جلد گرفتار کرلیا جائے گا۔