بنوں میں سکیورٹی فورسز کا آپریشن، 5 دہشت گرد ہلاک، بکاخیل میں پل دھماکے سے تباہ

بنوں (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع بنوں کے علاقے جانی خیل میں سکیورٹی فورسز نے انٹیلی جنس بیسڈ آپریشن کے دوران دہشت گردوں کے ایک ٹھکانے کو نشانہ بنایا، جس کے نتیجے میں پانچ دہشت گرد ہلاک اور تین سے چار زخمی ہو گئے۔ تاہم سکیورٹی فورسز کی جانب سے تاحال سرکاری طور پر تفصیلات جاری نہیں کی گئیں۔

ہلاک دہشت گردوں کا تعلق کالعدم تحریک طالبان پاکستان کے حافظ گل بہادر گروپ سے بتایا گیا ہے۔

ادھر گوڑہ بکاخیل میں دہشت گردوں نے ایک پل پر بارودی مواد نصب کرکے دھماکے سے تباہ کر دیا، جس کے باعث پل کو شدید نقصان پہنچا۔ 

پولیس کے مطابق گزشتہ رات بھی اسی علاقے میں پل کو اڑانے کی کوشش کی گئی تھی، تاہم اس بار حملہ آور اپنے مقصد میں کامیاب ہو گئے۔

واقعے کے بعد علاقے میں سکیورٹی سخت کر دی گئی ہے اور مقامی حکام نے عوام کو محتاط رہنے کی ہدایت کی ہے۔