بنوں میں سی ٹی ڈی اور پولیس کا مشترکہ آپریشن، 5 دہشت گرد ہلاک

بنوں (ڈیلی اردو) پاکستان کے شورش زدہ صوبہ خیبرپختونخوا کے شورش زدہ ضلع بنوں میں کاؤنٹر ٹیررازم ڈیپارٹمنٹ (سی ٹی ڈی) اور مقامی پولیس نے انٹیلیجنس اطلاعات کی بنیاد پر مشترکہ کارروائی کرتے ہوئے کالعدم تحریک طالبان پاکستان (ٹی ٹی پی) سے تعلق رکھنے والے پانچ دہشت گردوں کو ہلاک کرنے کا دعویٰ کیا ہے۔ حکام کے مطابق کارروائی کے بعد علاقے میں سرچ اینڈ کلیئرنس آپریشن بھی جاری رکھا گیا۔

سی ٹی ڈی بنوں ریجن کے مطابق آپریشن خفیہ اطلاعات کی بنیاد پر کیا گیا۔ جیسے ہی سکیورٹی اہلکار ہدف کے مقام پر پہنچے تو دہشت گردوں نے اندھا دھند فائرنگ شروع کر دی، جس کے جواب میں سی ٹی ڈی، سوات ٹیم اور مقامی پولیس نے مؤثر کارروائی کی۔

حکام کے مطابق دونوں جانب سے تقریباً 40 منٹ تک شدید فائرنگ کا تبادلہ جاری رہا، جس کے نتیجے میں پانچ دہشت گرد ہلاک ہو گئے، جبکہ متعدد دیگر فرار ہونے میں کامیاب ہوگئے۔ واقعے کے بعد پولیس کی اضافی نفری موقع پر پہنچ گئی اور فرار دہشت گردوں کی گرفتاری کے لیے علاقے میں سرچ اینڈ کلیئرنس آپریشن شروع کر دیا گیا۔

پولیس کا کہنا ہے کہ ہلاک دہشت گردوں کے قبضے سے پانچ کلاشنکوفیں، 10 میگزین، پانچ بنڈولیئر، دو ہینڈ گرینیڈ اور بڑی مقدار میں گولہ بارود برآمد کیا گیا، جسے قبضے میں لے کر مزید تفتیش شروع کر دی گئی ہے۔

ادھر انسپکٹر جنرل (آئی جی) خیبرپختونخوا پولیس اور ایڈیشنل آئی جی سی ٹی ڈی نے کامیاب کارروائی پر سی ٹی ڈی، سوات ٹیم اور مقامی پولیس کے اہلکاروں کی پیشہ ورانہ مہارت اور بہادری کو سراہتے ہوئے انہیں شاباش دی۔

آئی جی خیبرپختونخوا نے ہدایت کی کہ فتنہ الخوارج سے وابستہ دہشت گردوں، ان کے سہولت کاروں اور معاون نیٹ ورکس کے خلاف انٹیلیجنس پر مبنی کارروائیوں کو مزید مؤثر بنایا جائے۔

انہوں نے کہا کہ دہشت گردی کے مکمل خاتمے، ریاستی رٹ کے استحکام اور عوام کے جان و مال کے تحفظ کے لیے سی ٹی ڈی اور خیبرپختونخوا پولیس پوری قوت، عزم اور پیشہ ورانہ صلاحیت کے ساتھ اپنی کارروائیاں بلا تعطل جاری رکھے گی، جبکہ دہشت گردوں کو ان کے محفوظ ٹھکانوں تک تعاقب کرکے قانون کے کٹہرے میں لایا جائے گا۔