بنوں میں سی ٹی ڈی اور پولیس کا مشترکہ آپریشن، پاکستانی طالبان کے دو دہشت گرد ہلاک

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں ‏کاؤنٹر ٹیررازم ڈیپارٹمنٹ (سی ٹی ڈی) اور پولیس نے مشترکہ کارروائی کرتے ہوئے کالعدم تحریک طالبان پاکستان (ٹی ٹی پی) کے دو انتہائی مطلوب دہشت گردوں کو ہلاک کر دیا۔

تفصیلات کے مطابق سی ٹی ڈی کو خفیہ اطلاع ملی تھی کہ ممہ خیل ہوید کے علاقے میں شرپسند عناصر بڑی تخریبی کارروائی کی منصوبہ بندی کر رہے ہیں۔ اطلاع ملنے پر سی ٹی ڈی اور پولیس کی ٹیموں نے علاقے کا محاصرہ کیا، جس دوران دہشت گردوں سے شدید فائرنگ کا تبادلہ ہوا جو آدھے گھنٹے سے زائد جاری رہا۔

جوابی کارروائی میں دو دہشت گرد مارے گئے جبکہ ان کے دیگر ساتھی فرار ہونے میں کامیاب ہوگئے۔ علاقے میں سرچ آپریشن جاری ہے۔

پولیس کے مطابق ہلاک دہشت گردوں کی شناخت فضل اللہ عرف فیض اللہ عرف حنظلہ اور سفیر الرحمن ولد ولی داد کے ناموں سے ہوئی ہے۔

فضل اللہ پولیس اہلکار کانسٹیبل جاوید پر حملے اور اغوا، کانسٹیبل نصراللہ اور حیات اللہ کو ہلاک کرنے، اور پولیس چوکی شیخ لنڈک پر حملے سمیت کئی سنگین وارداتوں میں مطلوب تھا۔

دوسرا دہشت گرد سفیر الرحمن پولیس اہلکار کانسٹیبل زبیر کو ہلاک کرنے اور پولیس پوسٹس فتح خیل اور خیراکی ممہ خیل پر حملوں میں ملوث تھا، جن میں کانسٹیبل ایثار خان اور اجمل خان زخمی ہوئے تھے۔

کارروائی کے دوران دہشت گردوں کے قبضے سے ایک کلاشنکوف، ایک 9 ایم ایم پستول، دو ہینڈ گرینیڈ، دو میگزین، دو موبائل فونز اور کالعدم تنظیم کا کارڈ برآمد ہوا۔

انسپکٹر جنرل آف پولیس خیبر پختونخوا اور ایڈیشنل آئی جی سی ٹی ڈی نے کامیاب آپریشن پر سی ٹی ڈی اور بنوں پولیس کے جوانوں کو سراہتے ہوئے کہا کہ دہشت گردی کے خاتمے تک کارروائیاں جاری رہیں گی۔