بنوں میں سیکورٹی فورسز کا آپریشن، کمانڈر عبداللہ سعید سمیت 15 دہشت گرد ہلاک

واشنگٹن (ڈیلی اردو) پاکستان کے شورش زدہ صوبہ خیبرپختونخوا کے ضلع بنوں میں تھانہ میریان کی حدود میں پولیس، سی ٹی ڈی اور دیگر قانون نافذ کرنے والے اداروں نے انٹیلی جنس بیسڈ آپریشن کیا، جس کے دوران اہم کمانڈر سمیت 15 دہشت گرد ہلاک جبکہ 10 زخمی ہو گئے۔

سرکاری اور مقامی ذرائع کے مطابق آپریشن کئی گھنٹوں تک جاری رہا، جس دوران شدید فائرنگ اور جھڑپوں کا سلسلہ جاری رہا۔ کارروائی کے دوران سکیورٹی فورسز نے دہشت گردوں کے ٹھکانوں کو نشانہ بنایا۔

آپریشن کے دوران مجموعی طور پر چار افراد ہلاک ہوئے جن میں ایک پولیس اہلکار، ایک ایف سی اہلکار اور دو عام شہری شامل ہیں۔

آپریشن کے دوران پولیس، امن کمیٹی اور اتحاد المجاہدین پاکستان (آئی ایم پی) کے درمیان کئی گھنٹوں تک جاری جھڑپوں میں اہم کمانڈر استاد عبداللہ سعید کی ہلاکت کی بھی تصدیق ہو گئی ہے۔

افغانستان کے صوبہ لوگر سے تعلق رکھنے والا عسکریت پسند اور نظریاتی مبلغ استاد عبداللہ سعید طالبان حلقوں میں اپنی تقاریر، میڈیا پر موجودگی اور پاکستان مخالف بیانات کے باعث خاصا مشہور تھا۔

استاد عبداللہ سعید کو اتحاد المجاہدین پاکستان کا اہم نظریاتی رہنما سمجھا جاتا تھا۔ حالیہ عرصے میں ان کا اثر و رسوخ نمایاں طور پر بڑھا تھا اور ان کے خطابات جہادی حلقوں اور آن لائن فورمز پر وسیع پیمانے پر شیئر کیے جا رہے تھے۔