بنوں میں عسکریت پسندانہ حملے: ایس ایچ او سمیت دو پولیس اہلکار ہلاک، تھانہ احمدزئی پر حملہ ناکام

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں عسکریت پسندوں کی کارروائیوں کے نتیجے میں ایس ایچ او سمیت دو پولیس اہلکار ہلاک ہو گئے جبکہ تھانہ احمدزئی پر ہونے والا حملہ پولیس نے ناکام بنا دیا۔ 

دو روز قبل اغوا ہونے والے پولیس کے ایس ایچ او عابد کو نامعلوم عسکریت پسندوں نے اغوا کیا تھا اور آج نالہ پل داود شاہ کے قریب سے اُن کی لاش برآمد ہوئی، جسے پوسٹ مارٹم کے لیے ہسپتال منتقل کر دیا گیا ہے۔

 پولیس کے مطابق ہلاک ہونے والے ایس ایچ او کو اغوا کے بعد گولی مار کر قتل کیا گیا اور واقعے کے بعد پولیس اور سیکیورٹی فورسز نے ملزمان کی تلاش میں بنوں، میرعلی اور میران شاہ روٹس پر ناکہ بندی سخت کر دی ہے۔ 

عابد اللہ وزیر پہلے بطور سب انسپکٹر تعینات تھا تاہم وہ نوکری سے برخاست ہو چکا تھا۔ 

اسی روز بنوں شہر میں نامعلوم مسلح موٹر سائیکل سواروں نے پولیس کانسٹیبل الیاس کو اس کے گھر کے قریب فائرنگ کر کے ہلاک کر دیا، مقتول اہلکار انوسٹی گیشن اسٹاف تھانہ صدر سے تعینات تھا اور سکنہ والخئی ممہ خیل تھا۔ حملہ آور فائرنگ کے بعد فرار ہو گئے اور بتایا گیا کہ وہ مندیو کی جانب روانہ ہوئے۔

پولیس نے علاقے کو گھیرے میں لے کر سرچ آپریشن شروع کر دیا۔ 

اس دوران ضلع بنوں کے تھانہ احمدزئی پر شرپسندوں نے چھوٹے اور بڑے ہتھیاروں سے حملہ کرنے کی کوشش کی، جسے پولیس نے بروقت اور مؤثر کارروائی کرتے ہوئے ناکام بنا دیا۔

 پولیس کی جوابی فائرنگ سے متعدد حملہ آور ہلاک اور زخمی ہوئے جنہیں ان کے ساتھی اپنے ساتھ لے کر فرار ہوئے۔ حکام کے مطابق علاقے میں سرچ آپریشن جاری ہے اور عسکریت پسندوں کی گرفتاری کے لیے سی ٹی ڈی اور دیگر سیکیورٹی اداروں کی مشترکہ کارروائیاں تیز کر دی گئی ہیں۔